Qazaqstan ókilderi Eýropa habar taratý odaǵynyń sessııasyna qatysty
OSLO. QazAqparat - Norvegııa astanasynda Eýropa habar taratý odaǵynyń bas assambleıasynyń 82-sessııasy ótti. Atalmysh jıynǵa Qazaqstan atynan «Habar» agenttigi qatysty, dep habarlaıdy QazAqparat tilshisi.
Sessııada negizinen Eýropa habar taratý odaǵyna kiretin elderdiń jańa tuǵyrnamasyn damytý máseleleri talqylandy. Dástúrli medıanyń qıyndyqtaryn digital- tásildermen sheshý, ǵasyrdyń ozyq tehnologııalaryn habar taratý naryǵyna der kezinde engizip otyrý máseleleri de qaraldy. «Qazaqstan úshin bul bir jaǵynan úlken qurmet. Ekinshi jaǵynan úlken tájirıbe. Biz atalmysh odaqtyń qaýymdasqan múshesimiz. Osy odaqtyń tolyqqandy múshesi bolý úshin qazirdiń ózinde kóptegen talpynystar jasalyp jatyr. Olar uıymdastyrǵan konferentsııalarǵa qatysyp, ózge múshe eldermen baılanysyp ornatyp jatyrmyz. Eurovision Junior baıqaýyna belsendi qatysa bastadyq», - deıdi «Habar» arnasynyń baǵdarlama ortalyǵynyń dırektory Aıkúmis Seksenbaeva.
Onyń aıtýynsha, Danelııa Tóleshovanyń ótken jyly atalmysh sahnada kórsetken ónerin atqarylǵan jumystyń aıqyn nátıjesi dep ataýǵa bolady.
«Atalmysh alańda biz basqa elderdiń úzdik tájirıbelerin qabyldaı alamyz. Ásirese ozyq tehnologııa men kásipqoılyq qyrlaryn qabyldaýǵa úlken múmkindik bar. Eýropa habar taratý odaǵynyń quramyna 56 múshe elden 117 uıym jáne biz sııaqty qaýymdastyrylǵan 73 múshe kiredi. «Habar» agenttigi 2016 jyldan bastap osy sapta bolsa da, bıyl alǵash ret bas assambleıanyń sessııasyna qatysty», - deıdi agenttik ókili.
