Qazaqstan ókilderi alǵash ret Roma Fashion Week sán aptalyǵyna qatysady
ASTANA. QazAqparat - Elordada Roma Fashion Week sán aptalyǵyna Qazaqstan atynan qatysatyn úzdik kıim jáne aksessýarlar dızaınerin, sángerlerdi, vızajısterdi, stılısterdi, fotograftar/vıdeograftardy irkteýge arnalǵan alǵashqy ortaazııalyq týr ótti, dep habarlaıdy QazAqparat.
Roma Fashion Week óńirlik irikteý týrlary jyl saıyn Japonııa, Germanııa, Baltyq jaǵalaýynda, Reseıdi qosa alǵanda 20-dan astam elde ótedi.
«Qazaqstanda ol alǵash ret resmı túrde ótýde. Degenmen, buǵan deıingi jyldarda biz ıtalıandyq sán aptalyǵyna qonaq retinde qatysqan bolatynbyz. Ótken jyly ıtalıandyq tarap bizge Orta Azııadaǵy irikteý týryn uıymdastyrýdy usyndy. Konkýrsqa qatysýshylardan shamamen 100 ótinish kelip tústi. Astanaǵa Qazaqstannyń barlyq óńirlerinen, Qyrǵyzstan men Armenııadan qatysýshylar keldi. Onlaın ótinim Ózbekstan, Tájikstan jáne Túrkimenstannan da keldi. Nátıjesinde fınalǵa 25 adam ótti. Basty maqsat - barsha álemge Qazaqstanda da bıýtı-sala men sán bıznesinde talantty adamdardyń az emestigin pash etý. Olardyń barlyǵy birdeı kásibı sheberler emes. Degenmen, olar bolashaǵynan zor úmit kúttiredi», - dedi Roma Fashion Week-tiń Ortalyq Azııadaǵy resmı ókili, Asian Look Fashion Days bas dırektory, tanymal qazaqstandyq dızaıner Qanat Saýranbaev.
Astanada ótken óńirlik irikteý týrynyń aqtyq synyna jetken dızaınerler 3-7 sáýir aralyǵynda Italııa astanasy Rımde ótetin konkýrstyń halyqaralyq fınalyna qatysý múmkinshiligin aldy. Aǵymdaǵy jyly oǵan alty qurlyqtyń 24 elinen dızaınerler qatysady.
Rım kezeńinde jeńiske jetkender Italııanyń tanymal Cordella sán mektebinde, Romeur Academy sulýlyq akademııasynda, ıtalıandyq sán úılerinde tegin bilim alyp, taǵlymdamadan ótedi. Sángerler sonymen birge ıtalıandyq sán agenttikterimen 1 jylǵa kelisimshartqa otyryp, ıtalıandyq irikteý týrynyń demeýshisiniń Mercedes Benz kóligine ıe bolady.
