Qazaqstan offshorlardy qoldanýǵa qarsy jappaı kúres júrgizedi
ASTANA. QazAqparat - Qazaqstan otandyq kásiporyndardyń offshorlardy qoldanýyna qarsy jappaı kúres júrgizedi. Bul týraly búgin Sybaılas jemqorlyqqa jáne kóleńkeli ekonomıkaǵa qarsy is-qımyl jónindegi qoǵamdyq keńestiń otyrysynda Qarjy polıtsııasy aqparattyq-saraptamalyq departament basshysy Oljas Bektenov aıtty.
Onyń aıtýynsha, osy máselege qarjy polıtsııasy jańa jemqorlyqqa qarsy strategııasyn jasaǵan kezde basty nazar aýdarǵan.
«Qazaqstandyq kompanııalardyń óz jumystaryn jabyq túrde júrgizýi alańdaýshylyq týǵyzady. Qazirgi kezde kompanııa benefıtsıaryn anyqtaýdyń ózi múmkin emes bolyp barady», - dep atap ótti O.Bektenov. Onyń aıtýynsha, offshorlyq ıýrısdıktsııalar kompanııalarǵa zańsyz túrde jınalǵan, tipti sybaılas jemqorlyq arqyly kelgen qarajatty zańdastyrýǵa jol ashady. «Osynyń kesirinen sol aram aqsha Qazaqstanǵa sheteldik ınvestıtsııalar retinde keledi. Sondyqtan, bizdiń pikirimizshe, memlekettik organdar men kvazımemlekettik sektorǵa bıýdjettik qarajattyń árbir tıynyna deıin eseptiligin kúsheıtip, memlekettik satyp alýlar arqyly júzege asyrylatyn memlekettik qarajattyń kóp mólsherde shetel asyp ketýin joıý qajet», - dedi ol. Sonymen qatar, O.Bektenovtiń aıtýynsha, jemqorlyqqa qarsy jańa strategııada QR azamattarynyń kirisi men shyǵysyn deklaratsııalaý normasy qarastyrylady.
