Qazaqstan oblıgatsııalary halyqaralyq ındekske enýi múmkin
ASTANA. KAZINFORM — 7 qazanda álemdegi jetekshi ınvestıtsııalyq bankterdiń jáne halyqaralyq qarjy ındeksterin ázirleý men jarııalaý salasyndaǵy kóshbasshylardyń biri J.P. Morgan Qazaqstannyń memlekettik baǵaly qaǵazdaryna Index Watch-Positive mártebesin berý týraly resmı habarlama jarııalady.
Ol keıin damýshy naryqtardaǵy memlekettik oblıgatsııalardyń GBI-EM ındeksine engizý yqtımaldyǵyn rastaıdy. Atalǵan ındeks ulttyq valıýtalardaǵy memlekettik oblıgatsııalar úshin álemdegi negizgi baǵdarlardyń biri sanalady jáne jahandyq ınstıtýtsıonaldyq ınvestorlar ınvestıtsııalyq portfelderin jasaqtaý kezinde keńinen paıdalanady.
Atalǵan mártebeniń berilýi Qazaqstannyń halyqaralyq qarjy naryqtaryna ıntegratsııalanýy jolynda mańyzdy kezeń sanalady jáne Ulttyq banktiń Qazaqstannyń memlekettik baǵaly qaǵazdaryn Qarjy mınıstrligimen birlesip halyqaralyq ındeksterge engizý, naryq ınfraqurylymyn damytý jáne sheteldik ınvestorlar úshin jergilikti boryshtyq naryqtyń qoljetimdiligin arttyrý baǵytynda júrgizgen júıeli jumysynyń nátıjesi boldy.
— J.P. Morgan baǵalaýyna sáıkes, Qazaqstan GBI-EM Global Diversified ındeksine engizilgen jaǵdaıda, onyń aldyn ala úlesi 0,48% bolady. Qazaqstan Qytaı, Úndistan, Indonezııa, Meksıka jáne basqa da eldermen birge osy ındekstiń quramyna ótedi. Bul rette J.P. Morgan halyqaralyq ınvestıtsııalyq portfelderdi ártaraptandyrý úshin Qazaqstan naryǵynyń aıtarlyqtaı áleýeti bar ekenin alǵa tartady.
J.P. Morgan óz esebinde sheteldik ınvestorlardyń qatysý úlesi artqanyna toqtalyp, Qazaqstannyń boryshtyq naryǵyn damytý boıynsha iske asyrylǵan sharalardy, onyń ishinde memlekettik baǵaly qaǵazdardyń ótimdiligin arttyrý jáne qaıtalama naryqty damytý maqsatynda bastapqy dılerler ınstıtýty engizýdi, sondaı-aq qaıtalama naryqtaǵy saýda-sattyq kóleminiń óskenin joǵary baǵalaǵan. J.P. Morgan derekterine sáıkes, qaıtalama naryqtaǵy saýda-sattyqtyń ortasha aılyq kólemi jyl basynan beri 86%-ǵa ulǵaıǵan, — delingen Ulttyq bank habarlamasynda.
Sonymen qatar, Ulttyq bank pen Qazaqstan Respýblıkasynyń Qarjy naryǵyn retteý jáne damytý agenttigi tarapynan júzege asyrylǵan birqatar bastama atalǵan, atap aıtqanda: naryqtyq aqparattyń ashyqtyǵy men qoljetimdiligin arttyrýǵa baǵyttalǵan Capital Markets Kazakhstan aqparattyq portalyn iske qosý, Azııa damý bankiniń qoldaýymen sheteldik ınvestorlarǵa arnalǵan Qazaqstannyń jergilikti oblıgatsııalar naryǵy boıynsha nusqaýlyqty (Bond Market Guide for Kazakhstan) jarııalaý jáne Qazaqstannyń ASEAN+3 oblıgatsııalar naryǵy forýmyna (ASEAN+3 Bond Market Forum) qatysýy bar.
Aldaǵy jumystyń negizgi baǵyttarynyń biri halyqaralyq eseptik-depozıtarlyq ınfraqurylymdy damytý bolyp qala beredi, osy baǵytta Ulttyq bank júıeli jumys júrgizip otyr.
Index Watch-Positive aıasynda Qazaqstandy baǵalaý kezeńi 12 aıǵa deıin sozylady. Osy ýaqyt ishinde J.P. Morgan naryq ótimdiligin, halyqaralyq ınvestorlar úshin naryqtaǵy qoljetimdilikti jáne esep eseptik-depozıtarlyq ınfraqurylymnyń keleshek damý úrdisin baǵalaıtyn bolady.
Index Watch-Positive mártebesiniń berilýi elde júrgizilip jatqan reformalardyń halyqaralyq deńgeıde moıyndalǵanyn rastaıdy jáne sheteldik ınvestıtsııalardy tartýǵa, ınvestorlar bazasyn keńeıtýge jáne Qazaqstannyń memlekettik baǵaly qaǵazdar naryǵyn odan ári damytýǵa qosymsha alǵyshart beredi. Baıqalyp otyrǵan ınvestorlar bazasynyń keńeıý úrdisi jergilikti memlekettik baǵaly qaǵazdarǵa suranysty arttyryp, Qazaqstan úshin qaryz alý qunyn tómendetýge yqpal etetinin atap ótken jón.
Aıta ketelik 100 mıllıon teńgeden asatyn bıýdjet shyǵyndary tsıfrlyq teńgege aýdarylatyny týraly jazǵan edik.
