«Qazaqstan-Norvegııa» matchyna bılet qoldan-qolǵa qanshadan satylyp jatyr
ALMATY. KAZINFORM — Búgin 19:00-de Almaty Ortalyq stadıonynda ÝEFA Ulttar Lıga aıasynda Qazaqstan men Norvegııa quramalary arasynda match ótedi. 20 tamyz kúni satylymǵa shyqqan bul matchtyń bıletteri bir táýlik ishinde tolyq ótip ketken.
Resmı málimetke sáıkes, match bıleti 2-10 myń aralyǵynda tek onlaın satylǵan. Sondaı-aq Qazaqstan fýtbol federatsııasy alypsatýdyń aldyn alý úshin satyp alynǵan bılet matchy bastalýyna 2 saǵat qalǵanda kórsetken poshtaǵa keletinin habarlady.
Degenmen, jelide Erlıng Holand pen Martın Edegor syndy álemdik fýtbol juldyzdary qatysatyn oıynǵa bıletterdi satyp alýǵa bolady. Ǵalamtordaǵy bılet quny 8 myńnan bastalyp 25 myńǵa deıin jetedi.
Satýshylardyń biri stadıonnyń shyǵys bóligi 44 sektordaǵy 2 bılettiń árqaısysyn 22 myń teńgege usynady. Al bıletti oıyn bastalar aldynda 1-2 saǵat buryn stadıon janynan beretinin aıtady.
Aıta ketken jón, Qazaqstan quramasynyń kapıtany Ashat Taǵybergen match aldyndaǵy baspasóz máslıhatynda dostarynyń bul oıynǵa bılet suraǵanyn aıtqan edi.
— Menen dostarym bılet surady. Men «sender Ulttyq quramany qoldaýǵa kelesińder me, álde Holandy kórýge me» deımin, — dedi qazaqstandyq fýtbolshy.
Eske salaıyq, buǵan deıin Norvegııa quramasy Almatydaǵy stadıonda jattyǵý ótkizgenin jazǵanbyz.
Sondaı-aq Almaty polıtsııasy kúsheıtilgen rejımge kóshti.
