Qazaqstan normatıvtik-quqyqtyq aktilerdi tirkeýdiń ortalyqtandyrylǵan rásimine kóshti

NUR-SULTAN. QazAqparat – Qazaqstan normatıvtik-quqyqtyq aktilerdi tirkeýdiń ortalyqtandyrylǵan rásimine kóshti. Bul týraly halyqqa onlaın rejımde esep berý kezdesýinde Ádilet mınıstri Marat Beketaev málim etti, dep habarlaıdy QazAqparat tilshisi.

«Normatıvtik quqyqtyq aktilerdi tirkeýge qatysty toqtalsam, Nur-Sultan qalasy jáne Qaraǵandy oblysyndaǵy pılottyq joba nátıjesi boıynsha bıyldyń mamyr aıynan bastap Ádilet mınıstrligimen jergilikti memlekettik basqarý organdarynyń normatıvtik quqyqtyq aktilerin tirkeý ortalyqtandyrylǵan formatta júrgiziledi. Bul protsedýraǵa kóshý biryńǵaı tájirıbeni jáne óńirlik normashyǵarmashylyq salasyndaǵy máselelerdi ýaqtyly ózektendirýdi qamtamasyz etti», - dedi mınıstr.

Buryn bul rásim Ádilet mınıstrliginiń aýmaqtyq bólimshelerimen júzege asyrylǵan.

Vedomstvonyń aqparaty boıynsha aýmaqtyq ádilet organdarynyń shtat sany ońtaılandyryldy. Únemdeý shamamen 250 mln teńgeni quraıdy.

Buǵan deıin Ádilet mınıstrligi Nur-Sultan qalasy men Qaraǵandy oblysynyń jergilikti memlekettik organdarynyń normatıvtik quqyqtyq aktilerin memlekettik tirkeýdi júzege asyrý boıynsha pılottyq jobany sátti iske asyrdy. Bul oń nátıje men jergilikti memlekettik organdardyń normatıvtik quqyqtyq aktilerin memlekettik tirkeýdiń ortalyqtandyrylǵan formatyn engizýdiń oryndylyǵyn kórsetkendigin aıta keteıik.