Qazaqstan Nıderlandynyń jylyjaı tehnologııalaryn engizýge nıetti

AMSTERDAM. QazAqparat – Amsterdamda GreenTech Week kórmesi aıasynda «Jylyjaılardy damytý múmkindikteri» atty konferentsııa ótti, dep habarlaıdy QazAqparat KAZAKH INVEST baspasóz qyzmetine silteme jasap.

Jıynǵa Qazaqstan Respýblıkasynyń Nıderlandy Koroldigindegi Elshisi Asqar Jumaǵalıev, QR Aýyl sharýashylyǵy vıtse-mınıstri Ábilhaıyr Tamabek, Dutch Greenhouse Delta Bas dırektory Erık Egberts jáne eki eldiń isker toptarynyń ókilderi qatysty.

Ábilhaıyr Tamabek Qazaqstannyń jylyjaı sektoryn damytý úshin Nıderlandy Koroldiginiń jylyjaı sharýashylyǵynda paıdalanylatyn joǵary tehnologııalardy engizý - jańa serpin beretinin aıtty.

Konferentsııaǵa spıkerlerdiń jartysy tikeleı qatyssa, keıbiri beınebaılanys arqyly qosyldy. Máselen, elordadan baılanysqa shyqqan KAZAKH INVEST Basqarma tóraǵasynyń orynbasary Jandos Temirǵalıev eki jaqty yntymaqtastyq, Qazaqstannyń ınvestıtsııalyq áleýeti men memlekettik qoldaý sharalary týraly baıandady.

Qatysýshylardyń pikirinshe, Qazaqstanǵa nıderlandylyq kásiporyndardan tehnologııalardy satyp alǵan qolaıly. Nıderlandy bizdiń elge ınvestıtsııa quıatyn seriktes elder arasynda jetekshi orynǵa ıe. Atap aıtqanda, sońǵy 10 jylda Koroldikten Qazaqstanǵa baǵyttalǵan tikeleı ınvestıtsııa kólemi 77,5 mlrd dollardy qurady.

Elimizdiń tarapynan Amsterdamǵa salalyq vedomstvo ókilderimen qatar nıderlandylyq baǵbandarmen iskerlik baılanys ornatýǵa múddeli 15 otandyq kásipker barǵan. Olar aldaǵy birneshe kúnde Nıderlandynyń birqatar jetekshi jylyjaı kásiporyndaryn aralaıdy. Ásirese, azyq-túlik ónimderin qaýipsiz óndiretin jylyjaılardaǵy ozyq tehnologııalar jáne jobalarmen tanysady.

Sapardy Qazaqstannyń Nıderlandtaǵy Elshiligi men KAZAKH INVEST Ulttyq kompanııasy birlesip uıymdastyrǵan.