Qazaqstan Nıderlandtyń sý tasqynymen kúres tájirıbesin zertteıdi
ASTANA. KAZINFORM — Qazaqstan men Nıderland sý tasqynyna qarsy is-qımyl jáne sala mamandaryn daıarlaý jóninde memorandýmdarǵa qol qoıdy.
Qol qoıý rásimine QR Sý resýrstary jáne ırrıgatsııa mınıstri Nurjan Nurjigitov, birinshi vıtse-mınıstr Bolat Beknııaz jáne Nıderland memleketiniń Qazaqstandaǵy Tótenshe jáne Ókiletti Elshisi Nıkolaas Shermers qatysty.
Alǵashqy qujat — Sý resýrstary jáne ırrıgatsııa mınıstrligi men Nıderland Syrtqy ister mınıstrligi arasyndaǵy ózara túsinistik týraly memorandým.
Qujat sý sharýashylyǵy qurylystaryn salý jáne paıdalaný, sý tasqynyn boljaý jáne sý tasqynyna qarsy is-sharalardy josparlaý máselelerinde yntymaqtastyqty kózdeıdi.
Kelisim tasqyn sýyn retteý men paıdalanýda tájirıbe almasý, sondaı-aq ózen aǵyndaryn basqarý bóliginde Nıderlandtyń tájirıbesin zertteýdi kózdeıdi.
Delft sý bilimi ınstıtýtymen (IHE Delft) qol qoıylǵan ekinshi memorandýmda sý salasynyń mamandaryn daıarlaý, sý salasynda ǵylym men ınnovatsııalyq tehnologııalar salasyndaǵy ózara is-qımyl qarastyrylǵan.
«Búgingi kezdesý — bizdiń Nıderland memleketimen qarym-qatynasymyzdyń mańyzdy kezeńi. Yntymaqtastyǵymyz aýqymdy jáne perspektıvaly jobalardy iske asyrýǵa kómektesetinine, al tájirıbe men tehnologııa almasý otandyq sý salasynyń áleýetin ashýǵa múmkindik beretinine senimdimin», — dedi Sý resýrstary jáne ırrıgatsııa mınıstri Nurjan Nurjigitov.
