Qazaqstan nıderlandtyq ınvestorlarǵa Aqtaý men Quryq porttaryn jańǵyrtýǵa qatysýdy usyndy
ASTANA. KAZINFORM – Qazaqstan nıderlandtyq ınvestorlarǵa Aqtaý men Quryq porttarynyń ınfraqurylymyn jańǵyrtýǵa qatysýdy usynady. Bul týraly Kólik vıtse-mınıstri Maqsat Qalıaqbarov aıtty.
«Qazaqstan óziniń strategııalyq ornalasýyna baılanysty tarıhı turǵyda Eýropa men Azııanyń túıisken jerindegi mańyzdy kólik toraby sanalady. Biz jahandyq logıstıkalyq júıeniń eń mańyzdy elementi sanalatyn temir joldar men teńiz porttaryn, áýejaılar men avtomobıl joldaryn qosa alǵanda, kólik ınfraqurylymymyzdy belsendi túrde damytýdy jalǵastyramyz. Osy jumystardyń aıasynda búginde kólik-logıstıka salasynda 136 joba qolǵa alynǵan. Onyń 69-y júzege asyrylýda, 67-si – perspektıvaly», - dedi ol elordada ótken Qazaqstan-Nıderlandy birinshi iskerlik keńesinde.
Onyń atap ótýinshe, temirjol kóligimen tranzıttik tasymaldaý kólemin ulǵaıtý úshin 1,3 myń shaqyrym jańa temir jol jelisi salynyp jatyr. Qurylys jumystary 2027 jyly aıaqtalady. Sonymen qatar 2029 jylǵa deıin 11 myń shaqyrym temir jol jóndeledi.
«Aqtaý jáne Quryq teńiz porttary Ortalyq Azııany Kavkazben, Túrkııamen jáne odan ári Eýropamen baılanystyra otyryp, Kaspıı teńizi arqyly júk tranzıtin qamtamasyz etýde sheshýshi ról atqarady. Bul porttar Iran aýmaǵy arqyly Parsy shyǵanaǵy elderine de shyǵýdy qamtamasyz etip, saýda men yntymaqtastyq úshin qosymsha múmkindikter ashady. Biz bul porttardy odan ári damytýdyń úlken áleýetin kórip otyrmyz jáne nıderlandtyq ınvestorlarǵa port ınfraqurylymyn jańǵyrtý men keńeıtýge qatysý múmkindikterin usynýǵa daıynbyz», - dedi Maqsat Qalıaqbarov.
Aıta keteıik, Prezıdent Qasym-Jomart Toqaev Egemen Qazaqstan gazetine jarııalaǵan «Ortalyq Azııa renessansy: ornyqty damý jáne órkendeý joly» atty maqalasynda Qazaqstan óziniń seriktesterimen birlesip, Transkaspıı halyqaralyq kólik baǵdaryn (Orta dáliz) barynsha damytyp jatqanyn atap ótken edi.
