Qazaqstan Nepalmen vızasyz rejım týraly kelissózder júrgizýde
ASTANA. KAZINFORM - Ázirge eki el arasynda jeńildetilgen vızalyq rejım bar. Bul - 30 kúnge jaramdy týrıstik vıza.
Qazaqstannyń Úndistandaǵy elshisi Nurlan Jalǵasbaev QR Nepaldaǵy Qurmetti konsýly Varýn Chaýdarıdiń muryndyq bolýymen Nepaldyń syrtqy ister mınıstri Naraıan Prakash Saýdpen kezdesti. Kezdesý barysynda vıza máselesi sóz boldy.
Sondaı-aq, Nurlan Jalǵasbaev qarjy mınıstrliginiń ókilderimen de júzdesti. Bul týraly QR Nepaldaǵy qurmetti konsýly keńsesiniń baspasóz qyzmeti habarlady.
Kelissózder nátıjesinde qos tarap Qazaqstan men Nepal syrtqy ister mınıstrlikteri arasynda saıası konsýltatsııalar ótkizýdi kózdeıtin ekijaqty kelisimdi ázirleý týraly sheshim qabyldady.
«Qazaqstanǵa dıplomatııalyq máseleler boıynsha oqý, jumysqa ornalasý jáne týrızm maqsatynda kirýge vızasyz rejım engizý múmkindigi qarastyrylýda. Sonymen qatar taraptar saýda, ekijaqty ınvestıtsııalardy qorǵaý jáne ilgeriletýge baǵyttalǵan kelisimge qol qoıý jaıly keńesti», - delingen habarlamada.
Varýn Chaýdarı Qazaqstanda oqý, jumysqa ornalasý, bıznes jáne basqa da maqsattar úshin múmkindikterdi izdep júrgen Nepal azamattary úshin vıza alý protsesin jeńildetýdiń mańyzdylyǵyn atap ótti. Ol yntymaqtastyq Nepal men Qazaqstan arasyndaǵy ekijaqty qarym-qatynastardy damytýǵa yqpal etetinine ári baıandy baılanys eki el úshin tıimdi bolatynyna senim bildirdi.
Varýn Chaýdarı - Nepaldyń iri kásipkeri. Oǵan tıesili CG Corp Global kompanııasy Túrkistan oblysynda Kazan brendimen Wai Wai kespesin shyǵaratynyn atap ótken jón.
