Qazaqstan nemistiń Xerion traktory óndirisin keńeıtýge nıetti

ASTANA. KAZINFORM – Qazaqstan nemistiń Xerion traktory óndirisin keńeıtýge nıetti. Bul týraly Aqordada Ónerkásip jáne qurylys mınıstri Qanat Sharlapaev aıtty.

Onyń dereginshe, búginde elimizde nemis kapıtaly salynǵan 21 joba júzege asyryldy.

«Germanııamen biraz ýaqyttan beri óte tyǵyz qarym-qatynas ornaǵan. Qazirdiń ózinde bizde, Qazaqstanda nemis kapıtalynyń qatysýymen 21 joba júzege asyryldy. Investıtsııanyń jalpy kólemi shamamen 1 mlrd eýro. Bul oraıda biz qurylys materıaldary, ilmekti armatýra óndirisi jaıynda aıtyp otyrmyz. Qaraǵandyda Bomer kompanııasy jumys istep tur. Knauf kompanııasy qurǵaq qospalar salasyndaǵy óte tanymal brendterdiń biri jáne Qazaqstan aýmaǵynda kóp ýaqyttan beri jumys isteıdi», - dedi ol.

Mınıstr júzege asyrý satysynda turǵan taǵy 5 jobanyń bar ekendigin aıtady.

«Olardyń biri – Knauf kompanııasymen Qazaqstan aýmaǵynda ınstallıatsııalyq materıaldar óndirisine qatysty joba. Elimizde aýyl sharaýshalyǵy tehnıkasyna úlken qajettilik bar. Óte tanymal álemdik Claas kompanııasy qazirgi ýaqytta Petropavlda óz tehnıkalaryn qurastyryp jatyr. Biz osy óndiristi keńeıtý baǵytynda jumys isteımiz. Kompanııa Qazaqstanǵa óziniń eń ozyq tehnıkasyn jetkizedi. Ol – Xerion traktory, óte tanymal model, jańa ázirleme. Qazirgi ýaqytta osy óndiristi keńeıtý úshin kelissóz júrgizýdemiz», - dedi Qanat Sharlapaev.

Buǵan deıin Aqordada Memleket basshysy Qasym-Jomart Toqaev Astanaǵa resmı saparmen kelgen Germanııanyń Federaldyq kantsleri Olaf Sholtsty qarsy alǵanyn habarlaǵan edik.