Qazaqstan nemis týrısterin qaıran qaldyrdy
ASTANA. QazAqparat - Germanııadan kelgen saıahatshylar Raınhard pen Ingrıd Kızelderdi elimizdiń tabıǵaty, qazaqtyń ulttyq mádenıeti men turmys-tirshiligi tań qaldyrdy, dep habarlaıdy Habar 24 telearnasy.
Shartarapty sharlap júrgen Raınhard pen Ingrıd Kızelder Astanaǵa da at basyn tiredi. 100 kúnde myńdaǵan shaqyrymdy eńsergen saıahatshylar 9 mamyrda Gambýrgten shyǵyp, osy kúnge deıin Máskeý, Qazan, Novosibir, Vladıvostok, Ulanbatyr sekildi qalalarda bolǵan.
«Biz 2014 jyly zeınetke shyqtyq. Sodan beri jahan kezip júrmiz. Ár halyqtyń mádenıetimen hám turmys-tirshiligimen tanysqymyz keledi. Búgingi ermegimiz osy», - deıdi Raınhard Kızel.
Otbasylyq jup osy kúnge deıin 20-dan astam memlekette bolǵan. Shaǵyn avtobýspen Soltústik jáne Ońtústik Amerıkany da aralap shyǵypty.
«Biz Astanada «Báıterek», Táýelsizdik saraıy, Úkimet úıi men EKSPO-ny kórdik. Mundaǵy ǵımarattardyń kórki kóz tartady. Aqıqatyn aıtý kerek, ásirese meni jergilikti turǵyndar tańǵaldyrdy. Qazaqstandyqtar - óte qonaqjaı halyq. Jol boıy bizge kómek qolyn sozyp, árkez qoldaý kórsetýge tyrysty», - deıdi germanııalyq saıahatshy.
Eýrazııaǵa saıahatty nemis otbasy Germanııa men barlyq memleketter arasyndaǵy dostyǵyna arnady. Jahankezderdiń bul týrnesi qazan aıynda aıaqtalady.
