Qazaqstan nemis kompanııalarymen yntymaqtastyqty keńeıte túspek
NUR-SULTAN. QazAqparat - Qazaqstan Respýblıkasy Premer-Mınıstriniń birinshi orynbasary Roman Sklıar men Qazaqstanda jumys isteıtin nemis bıznesiniń jetekshileri kezdesti, dep habarlaıdy QazAqparat Úkimettiń resmı saıtyna silteme jasap.
Onda birlesken ınvestıtsııalyq jobalardy iske asyrý barysy men Qazaqstan-Germanııa ekonomıkalyq yntymaqtastyǵyn odan ári keńeıtý josparlary talqylandy.
Sharaǵa Linde Gas, SIEMENS, Bayer, WILO Central Asia, Lufthansa Group jáne t.b. nemis kompanııalarynyń ókilderi qatysty.
Kezdesýde ekonomıkanyń túrli salalary, atap aıtqanda, mashına jasaý, metallýrgııa, energetıka, taý-ken metallýrgııa kesheni máseleleri talqylandy. Nemis áriptester álemdik naryqtyń turaqsyzdyǵy jaǵdaıynda Qazaqstan bıznesti damytý jáne jańa ınvestıtsııalar úshin tartymdy elge aınalyp kele jatqanyn atap ótti.
Osylaısha, Germanııa ekonomıkasynyń Ortalyq Azııadaǵy ókildiginiń basshysy Hovsep Voskanıan Qazaqstandaǵy iskerlik ahýaldyń qolaıly deńgeıin, sonymen qatar nemis bıznesi Qazaqstan Respýblıkasynyń Prezıdenti Qasym-Jomart Toqaev júrgizip jatqan ınstıtýtsıonaldyq reformalardy qoldaıtynyn aıtty.
«Siemens» JShS bas dırektory Dıas Asanov kompanııa qazirdiń ózinde respýblıkamyzda tsıfrlyq transformatsııalaý boıynsha pılottyq jobalardy júzege asyryp jatqanyna toqtaldy. Bolashaqta Siemens kólik salasynda ınnovatsııalyq sheshimderdi engizý boıynsha ınfraqurylymdyq jáne tehnologııalyq áriptes retinde osyndaı jobalarǵa qatysýǵa múddeli.
Óz kezeginde «Baıer KAZ» JShS bas dırektory Laýma Valtere Úkimettiń nazaryn jáne ashyq dıalogqa árqashan daıyn ekenin atap ótti, bul bıznes klımatty odan ári jaqsartýǵa yqpal etedi.
L. Valtere jańa ınnovatsııalyq preparattardy sertıfıkattaý tetigin ózgertýdi usyndy. Taý-ken metallýrgııa kesheni jobalaryn demonopolızatsııalaý máselelerin «thyssenkrupp Industrial Solutions» JShS bas dırektory Roman Karl kóterdi.
Kompanııa taý-ken, tsement jáne hımııa ónerkásibindegi ónimder men qyzmetterdiń keń spektrin usynýǵa daıyn ekenin málimdedi.
Kelissózder taraptardyń odan ári ózara tıimdi yntymaqtastyqqa múddeliligi men daıyndyǵyn kórsetti.
