Qazaqstan nemis ınvestorlaryna barynsha qolaıly jaǵdaı jasap otyr – Muhtar Tileýberdi
Mınıstr Germanııa ekonomıkasynyń jetekshi sektorlarynyń ókilderi kiretin iri bıznes delegatsııanyń Qazaqstanǵa kelgenin aıtty. Osy oraıda júrgiziletin kelissózder áleýetti jobalardy jáne ózara tıimdi jańa baǵytardy anyqtaýǵa yqpal etedi.
«Qazaqstan ınvestıtsııa úshin tartymdy el. 2021 jyly biz sheteldik ınvestıtsııa aǵynynyń pandemııaǵa deıingi deńgeıine oralyp qana qoımaı, ony 38 paıyzǵa arttyra aldyq. Byltyrdń qorytyndysy boıynsha Qazaqstanǵa tikeleı sheteldik ınvestıtsııalardyń jalpy aǵyny 24 mlrd dollardy qurady, bul 2020 jylmen salystyrǵanda 37,7 paıyzǵa joǵary. Álemdegi tórtinshi ekonomıka bolyp sanalatyn Germanııa bizdiń ekonomıkaǵa ınvestıtsııa salatyn alǵashqy on eldiń qataryna áli kirmegen. Sondyqtan Qazaqstannyń nemis ınvestorlary men kásipkerlerine jumys isteý úshin barynsha qolaıly jaǵdaılar usynǵanymyzǵa nazar aýdaramyz. Osy maqsatta biz Premer-Mınıstrdiń birinshi orynbasary Roman Sklıardyń basshylyǵymen nemis ınvestorlarymen jáne kásipkerlerimen ózara baılanys úshin teńdessiz úkimettik jumys tobyn qurdyq», - dedi M. Tileýberdi Germanııanyń Federaldyq Syrtqy ister mınıstri Annalena Berbokpen kezdesýden keıin
Osy oraıda atalǵan jumys tobynyń arqasynda nemis ınvestorlarynyń jobalaryna kelissózderdiń basynan bastap óndiristi tolyq qurýǵa deıin qoldaý jasalady.
«Biz ekonomıkamyzdyń 700 iri, orta jáne shaǵyn aktıvterin jekeshelendirip jatyrmyz. Bul nemis kásipkerleri úshin qosymsha perspektıvalar ashady. Nemis ınvestıtsııalary, ozyq tehnologııalary men noý-haýlary jáne Qazaqstannyń shıkizaty, bilikti jumysshylary ári qolaıly bıznes jaǵdaılary «win-win» qaǵıdaty boıynsha yntymaqtastyqty keńeıtýge senimdi negiz jasaıdy. Osy turǵyda Qazaqstanda ekonomıkanyń joǵary tehnologııalyq sektorlary úshin qajetti shıkizatty, sırek kezdesetin metaldardy bastapqy óńdeý, sondaı-aq ekologııalyq taza energııa kózderiniń óndirisin qurý salasyndaǵy yntymaqtastyq ózekti. Munyń quqyqtyq negizi sonaý 2012 jyly shıkizattyq, óndiristik jáne tehnologııalyq áriptestik týraly úkimetaralyq kelisimge qol qoıý arqyly jasalǵan bolatyn», - dedi M. Tileýberdi.
