Qazaqstan negizsiz baıyǵandardy jazalap, jemqorlyq jaıly habarlaǵandardy qorǵaý tásilderin kúsheıtedi

ASTANA. KAZINFORM — Memlekettik keńesshiniń tóraǵalyǵymen Sybaılas jemqorlyqqa qarsy is-qımyl jónindegi komıssııanyń kezekti otyrysy ótti. 

Basqosýda Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda aıtylǵan sybaılas jemqorlyqty azaıtýǵa yqpal etetin sharalar talqylandy.

Erlan Qarın jıynda Prezıdenttiń salyq salasyn jappaı tsıfrlandyrýǵa jáne sharýalarǵa nesıe berý úshin bankterdi sýbsıdııalaý tájirıbesin qolǵa alýǵa, salyq rejımderin ońtaılandyrýǵa jáne basqa da bastamalarǵa qatysty Joldaýda aıtylǵan tapsyrmalaryn tıimdi oryndaý sybaılas jemqorlyqqa qatysty syn-qaterlerdi barynsha tómendetýge múmkindik beretinin aıtty.

Sonymen qatar komıssııa otyrysynda Qazaqstan Respýblıkasynyń sybaılas jemqorlyqqa qarsy saıasatynyń 2022-2026 jyldarǵa arnalǵan tujyrymdamasyn júzege asyrý máselesi qaraldy.

Sybaılas jemqorlyqqa qarsy is-qımyl agenttigi, Oqý-aǵartý, Ǵylym jáne joǵary bilim mınıstrlikteri, «Atameken» ulttyq kásipkerler palatasy basshylarynyń esebi tyńdaldy.

Tujyrymdamany iske asyrý aıasynda birqatar keshendi shara qabyldandy. Onyń ishinde negizsiz baıý úshin jaýapkershilik engizý, sybaılas jemqorlyq týraly habarlaıtyn adamdardy qorǵaý tásilderin kúsheıtý, qoǵamdyq keńesterdiń rólin arttyrý jáne basqa da máseleler bar.

Parlamentke sybaılas jemqorlyqqa qarsy qosymsha sharalar qarastyrýdy kózdeıtin túzetýlerdiń kezekti toptamasy engizildi.

Jıyn sońynda Memlekettik keńesshi komıssııa múshelerine birqatar tapsyrma berdi.

Erlan Qarın elimizde sybaılas jemqorlyqty azaıtýǵa baǵyttalǵan tetikterdi jan-jaqty jáne júıeli túrde pysyqtaýdyń mańyzdy ekenin taǵy da atap ótti.