Qazaqstan nege kópvektorly saıasatty ustanady — sarapshy pikiri

Onyń aıtýynsha, Qazaqstannyń geografııalyq ornalasýy elge kópvektorly saıasattan basqa tańdaý bermeıdi.

— 1994 jyly jas dıplomattar retinde Qazaqstannyń alǵashqy syrtqy saıası tujyrymdamasyn ázirlegende aldymyzǵa el kartasyn qoıyp, geografııamyzdy saraladyq. Sol kezde kópvektorly saıasattan basqa jol joq ekenin túsindik. Bul ustanym búgin de ózektiligin joǵaltqan joq. Áıtpese, aýmaǵy úlken memleket bolǵanymyzben, halyqaralyq protsesterdegi yqpalymyzdy joǵaltyp alýymyz múmkin edi. Sondyqtan kópvektorly saıasat — Qazaqstan úshin eń durys baǵyt, — dedi Qaırat Sarybaı.

Sarapshy halyqaralyq qatynastar júıesi ár kezeńde túrli ózgeristerdi ótkeretinin atap ótti. Onyń pikirinshe, qazirgi álemdegi geosaıası shıelenister ýaqytsha qubylys bolǵanymen, olardyń basty sebebi halyqaralyq quqyq normalarynyń saqtalmaýymen baılanysty.

— Prezıdentimiz osy kúnge deıin tarıh soǵystardyń tarıhy bolyp kelgenin aıtqan edi. Endi tarıhty óskeleń urpaqqa jańashyldyq beretin, adamzatqa ıgilik jasaıtyn jańa mádenıetter arqyly tanytý kerek degen oıyna tolyq qosylamyn. Halyqaralyq qatynastarda da tolqyndy kezeńder bolady: keıde shıelenis kúsheıse, keıde beıbit kezeń qaıta oralady. Biraq memleketter, ásirese iri derjavalar halyqaralyq quqyqqa nemquraıly qarasa, álemdegi jaǵdaıdyń turaqtalýy qıyn, — dedi Q. Sarybaı.

Spıker Qazaqstannyń basty maqsaty — Ortalyq Azııa men Eýrazııa keńistigindegi turaqtylyqqa úles qosý ekenin aıtty.

— Eger biz óz óńirimizdegi tynyshtyqty qamtamasyz etýge úles qosa alsaq, bul búkil halyqtyń ıgiligine qyzmet etedi. Qazaqstannyń eń úlken baılyǵy — onyń halqy jáne halyqtyń beıbitsúıgish bolmysy. Qazaq halqy eshqashan ózgeniń jerine kóz tikken emes. Bizge ata-babadan qalǵan jer jetkilikti. Sondyqtan basty mindet — osy jerdi damytý jáne ony qantógissiz saqtaý, — dedi Qaırat Sarybaı.

Onyń sózinshe, bul maqsatqa jetýde dıplomatııanyń róli erekshe.

— Ol úshin dıplomatııa bar, aldyn ala kelissózder bar. Qazaqstannyń kúshi de osynda. Elimizdiń syrtqy saıasaty táýelsizdik jyldarynan beri sabaqtastyqpen damyp keledi. Biz halyqaralyq uıymdarǵa kirip, keıin shyǵyp ketetin memleketterdiń qatarynda emespiz. Qazaqstan syrtqy saıasatta árdaıym dáıektilik tanytyp keledi, — dedi AÓSShK Bas hatshysy.

Qaırat Sarybaı Qazaqstannyń halyqaralyq bastamalary álemdik deńgeıde moıyndalǵanyn da atap ótti.

— Qazaqstan óziniń ustanymdaryn Eýrazııada, Túrki áleminde jáne Azııa keńistiginde naqty ister arqyly dáleldeı bildi. Elimiz halyqaralyq uıymdar jumysyna belsendi qatysyp qana qoımaı, Azııadaǵy ózara is-qımyl jáne senim sharalary jónindegi keńes sııaqty mańyzdy bastamalardy usynyp, olardy tabysty júzege asyrdy, — dep túıindedi dıplomat.

Buǵan deıin Qaırat Sarybaı Qazaqstannyń halyqaralyq arenadaǵy beıtaraptyq ustanymy jóninde pikirin bildirgen edi.