Qazaqstan nege afrıkashyl bolyp ketti – SІM jaýaby

ASTANA. KAZINFORM – Syrtqy ister mınıstrliginiń resmı ókili Aıbek Smadııarov áleýmettik jelidegi «Qazaqstan nege tym afrıkashyl bolyp ketti?» degen synǵa jaýap berdi.

- Bizdiń Afrıka qurlyǵy elderimen yntymaqtastyǵymyz aıtarlyqtaı belsendi damyp kele jatqanyn ózderińiz kórip otyrsyzdar. Qoǵamda osy baılanystar týraly suraqtar týyndap otyr. Sondyqtan Qazaqstannyń syrtqy saıasatynyń osy baǵytta atqaryp jatqan jumystary týraly qysqasha túsinik bergim keledi, - dep bastady SІM resmı ókili.

Aıtýynsha, Afrıka elderimen ІT jáne elektrondyq úkimet salasyndaǵy ózara is-qımyl asa jemisti bolyp otyr.

- Memlekettik qyzmetterdiń tsıfrlanýy, Smart-sheshimder jáne ınfraqurylymdy damytý baǵytynda tájirıbe almasyp jatyrmyz. Bizdiń jobalar kóptegen afrıkalyq el úshin praktıkalyq mánge ıe. Resmı saparlar jıi ózara baılanystardyń qozǵaýshy kúshi bolady. Mundaı qarym-qatynastardyń jandanýy dıplomatııalyq ókildikterimizdiń keńeıýimen baılanysty. 2012 jyly Afrıka qurlyǵynda tek Mysyrda ǵana elshiligimiz boldy. Qazir olardyń sany 6-ǵa jetti – Mysyr, Ońtústik Afrıka Respýblıkasy, Efıopııa, Marokko, Aljır jáne Kenııada elshilikterimiz bar, - dedi ol.

Aıbek Smadııarov dıplomatııalyq mıssııalardy ashý naqty ekonomıkalyq nátıjeler bergenin aıtady.

- Eger 2012 jyly Qazaqstannyń Afrıka elderimen taýar aınalymy shashamen 100 mln dollar bolsa, 2022 jyly ol alǵashqy ret 1 mlrd dollardan asty. Bul – qazaq-afrıkalyq saýda tarıhyndaǵy rekord. Sonymen qatar dıplomatııalyq mıssııalary joq elderde qurmetti konsýldar ınstıtýtyn belsendi túrde damytyp kelemiz. Búgin Qazaqstan Afrıkaǵa kúkirt, munaı koksyn metall ónimderin, aýyl sharýashylyǵy ónimderi men mıneraldy tyńaıtqyshtardy eksporttaıdy. Mysaly, bıyl mamyrdyń basynda 15 jyldan keıin alǵashqy ret qazaq dándi daqyldarynyń partııasy Marokkoǵa jiberildi. Bul eksport baǵytynda ártaraptandyrýda mańyzdy qadam boldy. Sonymen qatar dándi daqyldardy Mysyr, Nıgerııa, Kot-d'Ivýar, Senegal jáne basqa da qurlyq elderine jetkizý máseleleri qarastyrylyp otyr. Afrıkadan Qazaqstanǵa jemister, kofe, kakao burshaqtary, shaı, farmatsevtıkalyq ónimder, tekstıl, kosmetıka jáne elektr tehnıkasy tasymaldanady, - dedi SІM resmı ókili.

Qazaqstan Afrıka elderimen baılanysty kúsheıtýge basa mán beretinin jazǵan bolatynbyz.