Qazaqstan násildik kemsitýdiń barlyq nysandaryn joıý týraly halyqaralyq tujyrymdamany oryndaý jónindegi baıandamasyn sátti qorǵady
ASTANA. Naýryzdyń 9-y. QazAqparat /Marlan Jıembaı/ - Qazaqstan BUU Násildik kemsitýshiliktiń barlyq nysandaryn joıý komıtetinde násildik kemsitýdiń barlyq nysandaryn joıý týraly halyqaralyq tujyrymdamany oryndaý jónindegi 4-5-shi biriktirilgen baıandamasyn sátti qorǵap qaıtty.
Bul týraly búgin atalǵan sharaǵa oraı ótken baspasóz máslıhatynda Mádenıet jáne aqparat vıtse-mınıstri Ǵazız Telebaev málim etti.
Onyń aıtýynsha, Jeneva qalasynda aqpannyń 26-sy men naýryzdyń 1-i aralyǵynda ótken otyrysqa elimizdiń jaýapty memlekettik organdarynyń atap aıtqanda, Syrtqy ister, Mádenıet jáne aqparat, Bilim jáne ǵylym, Eńbek jáne halyqty áleýmettik qorǵaý, Іshki ister, Ádilet, Densaýlyq saqtaý mınıstrlikteriniń, Bas prokýratýra men Joǵarǵy sottyń, sonymen qatar Qazaqstan halqy Assambleıasy, Adam quqyqtary jónindegi ulttyq ortalyqtyń ókilderinen quralǵan delegatsııa qatysqan.
BUU komıteti sarapshylarynyń elimizdiń etnıkaaralyq qatynastar salasyndaǵy memlekettik saıasatyna, Qazaqstan halqy Assambleıasynyń jumys tájirıbesi men onyń etnıkalyq toptardyń quqyqtaryn qamtamasyz etýdegi róline oń baǵa berilgenin atap ótken Ǵ.Telebaı «bizge berilgen eń basty baǵa - Qazaqstannyń saıasaty ultaralyq qatynastardy retteýde, ony durys jolǵa qoıýda nemese adamdardy násiline, ultyna, shyǵý tegine qaramaı qorǵaýda óte joǵary baǵalanǵandyǵynda» dedi.
Sondaı-aq vıtse-mınıstrdiń sózine qaraǵanda, komıtet músheleri elimizdiń tilge, kóshi-qon saıasatyna jáne násildik kemsitiýshiliktiń aldyn alýdaǵy zań shyǵarýshy jáne quqyqtyq tájirıbesine qyzyǵýshylyq tanytyp birqatar saýaldar qoıǵan. «Qoıylǵan suraqtardyń barlyǵyna delegatsııa músheleri tuşymdy jaýap berdi», dedi Ǵ.Telebaı.
BUU komıteti Qazaqstannyń etnıkaaralyq jáne konfessııaaralyq kelisimdi nyǵaıtý, elde turatyn barlyq azamattardyń azamattyq, saıası, áleýmettik, ekonomıkalyq, mádenı quqyqtaryn qamtamasyz etýge baǵyttalǵan is-sharalaryna joǵary baǵa bergen.
Aıta keteıik, bul komıtet násildik kemsitýshiliktiń barlyq nysandaryn joıý týraly halyqaralyq konventsııanyń oryndalýyna baqylaý jasaý maqsatynda qurylǵan. Onyń quramyna 18 sarapshy kiredi. Aǵymdaǵy jyly osy komıtet aldynda Qazaqstanmen qatar Argentına, Kambodja, Kamerýn, Islandııa, Japonııa, Panama, Slovakııa sııaqty memleketter baıandama jasady.
