Qazaqstan naryǵynda sheteldik sapasyz taýarlardyń úlesi artýda – Sultanov

NUR-SULTAN. QazAqparat – Saýda jáne ıntegratsııa mınıstri Baqyt Sultanov Qazaqstan naryǵyna kirgizilip jatqan sheteldik taýarlardyń sapasy tómen ekenin málim etti, dep habarlaıdy QazAqparat tilshisi.

«Búgin biz ishki naryqta sheteldik taýarlardyń artyp bara jatqanyn kórip otyrmyz. Olar negizinen sapasy tómen taýarlar. Bul bizdiń azamattarymyzdyń ómir súrý sapasynyń deńgeıine de áser eteri sózsiz. Búgingi kúrdeli problemalardyń biri – qabyldanǵan 8800-den astam ulttyq standarttyń jartysy qajetsiz degen oımen bızneste qoldanylmaıtyny. Otandyq ónimniń qaýipsizdigin qamtamasyz etetin synaq bazasy da jańǵyrtýdy qajet etedi», - dedi mınıstr Úkimet otyrysynda.

Baqyt Sultanovtyń aıtýynsha, syrtqy naryqtaǵy otandyq taýardyń básekege qabilettiligi eksporttyq qorjyndy ártaraptandyrýdyń tómendigin kórsetedi.

«Sonymen qatar taýarlar men qyzmetter eksportyn shetelde ilgeriletý boıynsha qalyptasqan ınfraqurylymnyń joqtyǵy men qoıylǵan kedergiler syrtqy naryqtarǵa qol jetkizý protsesin áldeqaıda qıyndatady. Bul rette biz saýdanyń syrtqy jáne ishki kontýrlaryna yqpal etetin trendterdi de umytpaýymyz kerek. Іshki naryqta sheteldik bólshek saýda jelileriniń ekspansııasy baıqalýda. Olardyń sórelerinde kóbinese óz elderinde shyǵarylǵan ónimder satylyp jatyr», - dedi ol.

Aıta ketsek, búgin Úkimet saýdany damytýdyń memlekettik baǵdarlamasynyń 2021-2025 jyldarǵa arnalǵan tujyrymdamasyn bekitken bolatyn.