Qazaqstan naryǵyna kóptegen álemdik brend kelip jatyr - Álibek Qýantyrov

ASTANA. KAZINFORM – Qazaqstan naryǵyna kóptegen álemdik brend enip jatyr. Bul týraly QR Syrtqy ister mınıstriniń orynbasary Álibek Qýantyrov aıtty.

– Shynynda, kóptegen kompanııa el naryǵyna enýdi josparlap otyr jáne qazirdiń ózinde jumys istep jatqandary da az emes. Jumys júrip jatyr, biraq keıbir kompanııalar bizdiń elimizge kelgeli jatqanyn ashyq jarııalaǵan joq. Máselen, Mars kompanııasy bir úlken jobany qolǵa alyp jatyr. Bul qatarda Pepsi kompanııasy da bar, - dedi ol Senattyń jalpy otyrysynan keıingi baspasóz máslıhatynda.

Spıkerdiń aıtýynsha, amerıkalyq kompanııalardan bólek Arab túbeginen, Qytaıdan, Túrkııadan da kompanııalar kelmek.

– Olardyń bári álemdik brendter. Qazirdiń ózinde elimizde jumys istep jatqan jáne óz aýqymyn odan da keńeıtýdi kózdeıtinder de, sondaı-aq jańadan enip jatqandary da bar, - dedi Álibek Qýantyrov.

Sondaı-aq ol jaqynda elimizde áıgili brıtandyq-shvedtik farmatsevtıkalyq kompanııa jumysyn bastaıtynyn atap ótti.

– Jýyrda, 28 mamyrda álemdik AstraZeneca farmatsevtıkalyq kompanııasynyń óndiristik jelisi iske qosylady. Olar qaterli isik jáne basqa da aýrýlardy emdeıtin dári-dármek shyǵarady. Jaqynda biz Brıtanııaǵa saparymyzda olardyń Kembrıdjdegi keńsesinde boldyq. Olar bul jobaǵa óte joǵary mán berip otyr. Sol sekildi Pfizer, Polpharma kompanııalaryn atap ótýge bolady. Bul tek farmatsevtıka salasyndaǵy kompanııalar ǵana, - dedi vıtse-mınıstr.

Odan bólek, ol álemdik brendter ken ıgerý, qaıta óńdeý, ІT salalaryna da enip jatqanyn, olarǵa Qazaqstan naryǵy qyzyǵýshylyq týdyryp otyrǵanyn atap ótti.

Aıta keteıik, buǵan deıin ıspanııalyq kompanııa Qazaqstannyń sý ınfraqurylymyn jańǵyrtýǵa atsalysatynyn jazǵan edik.