Qazaqstan namysyn qorǵaǵan sportshy laıyqty syıaqysyn ala almaǵan
ASTANA. KAZINFORM — Almaty qalalyq soty memlekettik organdy ardager-sportshyǵa laıyqty kótermeleý aqysyn tóleýge mindettedi.
Sot deregine sáıkes, ol 2017 jáne 2018 jyldary Bolgarııanyń Plovdıv jáne Reseıdiń Perm qalalarynda ótken grek-rım kúresinen ardagerler arasyndaǵy álem chempıonatynda («S» dıvızıony) birinshi jáne ekinshi oryndy ıelengen. 2018 jyly sportshyǵa Qazaqstan Respýblıkasynyń halyqaralyq sport sheberi ataǵy berilgen. Osy jetistikterge qaramastan, ýákiletti organ talap qoıý merziminiń ótip ketkenin alǵa tartyp, aqshalaı yntalandyrýdy tóleýden bas tartqan. Sportshy bas tartýǵa baılanysty sotqa shaǵym túsirgen.
Almaty qalasynyń mamandandyrylǵan aýdanaralyq ákimshilik soty is materıaldaryn muqııat zerdeleı kele, talap qoıýshy joǵary sanatty sportshy ekenin, onyń álem chempıonattaryna qatysýy jáne júldeli orynǵa ıe bolýy Qazaqstan Respýblıkasynyń Grek-rım, erkin jáne áıelder kúresi federatsııasynyń resmı jazbalarymen rastalǵanyn anyqtady.
Sot salalyq zańnama Qazaqstannyń atynan qatysyp, halyqaralyq jarystarda júldeli oryndarǵa ıe bolǵan ardager-sportshylarǵa syılyqaqy tóleýge tyıym salmaıtynyn nemese shektemeıtinin atap ótti.
Sonymen qatar, ýákiletti organnyń talap qoıý merziminiń ótip ketýine qatysty ýájderi jaramsyz dep tanyldy, óıtkeni azamattyq zańnama ákimshilik baǵynystylyqqa negizdelgen qatynastarǵa qoldanylmaıdy. Budan bólek, sol ýaqytta qoldanysta bolǵan Erejeler tólemge ótinish berý merzimin qarastyrmaǵan.
— Nátıjesinde sot ýákiletti organnyń bas tartýyn zańsyz dep tanyp, júldeli oryndarǵa aqshalaı syıaqy tóleýge mindettedi. Sondaı-aq talap qoıýshyǵa tólengen memlekettik bajdy qaıtarýdy mindettedi. Apellıatsııalyq saty bul sheshimdi ózgerissiz qaldyrdy. Sottyń sheshimi zańdy kúshine endi. Osylaısha halyqaralyq jarystarda Qazaqstannyń namysyn qorǵaǵan almatylyq ardager-sportshy ózine tıesili aqshalaı syıaqyny sot arqyly sátti jeńip aldy, — delingen habarlamada.
Buǵan deıin ShQO-da stýdent qyz alıment tólemegen ákesin sotqa bergenin jazǵan edik.