Qazaqstan Mıanmadaǵy daǵdarystyń beıbit sheshimi úshin halyqaralyq yntymaqtastyqty qoldaıtynyn aıtty
ASTANA. KAZINFORM — Qazaqstan Mıanmadaǵy jaǵdaıǵa arnalǵan BUU konferentsııasynda ınklıýzıvti dıalogqa jáne azshylyqtardyń quqyqtaryn qorǵaýǵa beıildiligin rastady. Bul týralf SІM baspasóz qyzmeti málim etti.
Qazaqstan Respýblıkasynyń BUU janyndaǵy Turaqty ókili Qaırat Omarov Mıanmadaǵy rohındja jáne basqa da azshylyqtardyń jaǵdaıyna arnalǵan BUU Bas Assambleıasynyń Joǵary deńgeıli konferentsııasynda sóz sóıledi.
— Qazaqstan daǵdarystyń ornyqty ári ınklıýzıvti sheshimin tabýǵa baǵyttalǵan halyqaralyq kúsh-jigerdi qoldaıtynyn bildirdi. Óz sózinde qazaq dıplomaty qazirgi pikir almasýdy azshylyqtardyń quqyqtaryn qurmetteıtin, dıalogty ilgeriletetin jáne barlyq qaýymdastyqtardyń ekonomıkalyq ári áleýmettik progresine jaǵdaı jasaıtyn ujymdyq sheshimderge qol jetkizýdegi mańyzdy qadam retinde qarastyratynyn atap ótti, — delingen habarlamada.
Sonymen qatar Q.Omarov «Birligimiz — áralýandyqta» qaǵıdatyna negizdelgen ultaralyq jáne konfessııaaralyq kelisimdi nyǵaıtýdaǵy Qazaqstan tájirıbesiniń mańyzdylyǵyn, sonyń ishinde Astanada Álemdik jáne dástúrli dinder lıderleriniń sezin ótkizýdi atap ótti.
Qazaqstan BUU-ǵa múshe memlekettermen, óńirlik uıymdarmen jáne BUU qurylymdarymen azshylyqtardyń quqyqtaryn qorǵaý men óńirde turaqty beıbitshilikti qamtamasyz etýge baǵyttalǵan ujymdyq tásilderdi ilgeriletý úshin syndarly yntymaqtastyqqa ázir ekenin rastady.
Eske sala keteıik, buǵan deıin agenttike eksklıýzıvti suqbat bergen Mıanma kóshbasshysy Qazaqstanmen áriptestiktiń jańa kókjıegin ashyp otyrǵanyn aıtqan edi.