Qazaqstan mýzeıleriniń qorynda 4,5 mıllıonnan astam qundy jádiger bar – Aıda Balaeva
ASTANA. KAZINFORM – QR Mádenıet jáne aqparat mınıstri Aıda Balaeva qazaqstandyqtardy Halyqaralyq mýzeı kúnimen quttyqtady.
- Qurmetti dostar! Búgin álem jurtshylyǵy tarıh pen mádenıettiń, urpaq jadynyń amanatshylaryna arnalǵan mereke – Halyqaralyq mýzeı kúnin atap ótýde.
Qazirgi tańda elimizde 275 mýzeı jumys isteıdi. Olardyń árqaısysy halqymyzdyń baı tarıhı-mádenı jáne arheologııalyq murasyn saqtap, keler urpaqqa jetkizýde aıryqsha oryn alady.
Mýzeı – bul ótken men búgindi jalǵaıtyn, tarıh pen qundylyqtar qaıta tynys alatyn erekshe rýhanı keńistik, - dedi mınıstr.
Ol sózine Qazaqstan mýzeıleriniń qorynda 4,5 mıllıonnan astam qundy jádiger saqtaýly turǵandyǵyn atap ótti. Olardyń qatarynda «Altyn adam», «Taqsaı hanshaıymy» sekildi biregeı tarıhı artefaktilermen qatar, Stradıvarı men Gvarnerıdiń sırek mýzykalyq aspaptary syndy jaýhar dúnıeler bar.
Memleket basshysynyń aıryqsha qoldaýy men qamqorlyǵynyń nátıjesinde bıyl elimizdiń eki jetekshi mýzeıine – Ortalyq memlekettik mýzeı men Ábilhan Qasteev atyndaǵy Memlekettik óner mýzeıine «Ulttyq» mártebe berildi.
Bul – atalmysh mekemelerdiń elimizdiń mádenı murasyn saqtaý men ilgeriletý isindegi ólsheýsiz eńbegin aıǵaqtaıtyn mańyzdy qadam.
Otyrar, Saýran, Mańǵystaý óńiriniń eskertkishteri sııaqty ashyq aspan astyndaǵy mýzeıler búginde tarıhı-rýhanı mańyzy zor oryndar ǵana emes, sondaı-aq ǵylymı-aǵartýshylyq ortalyqtarǵa aınalyp otyr.
Bul jerler arqyly halqymyzdyń tereń tarıhyna betpe-bet kelip, onyń bolmysyn jan-tánimizben sezinemiz.
Mýzeılerimiz – tek jádiger saqtaıtyn oryn ǵana emes, sonymen qatar zertteý, aǵartý jáne qalpyna keltirý jumystaryn qatar júrgizetin mańyzdy ortalyqtar. Olar urpaqtar jadyn muqııat saqtap, ótken men búginniń arasyndaǵy altyn kópir qyzmetin atqarady.
Ótken jyldyń ózinde Qazaqstan mýzeılerin 6,6 mıllıonnan astam adam aralaǵan. Bul – qoǵamymyzda mýzeıge degen qyzyǵýshylyqtyń, tarıhı tanym men mádenı muraǵa degen qurmettiń artyp kele jatqanyn kórsetedi.
Bıyl elimizde Qytaı men Germanııa mýzeılerimen birlesken halyqaralyq bastamalar, áıgili Tretıakov galereıasynda ótetin otandyq óner týyndylarynyń kórmesi sekildi aýqymdy jobalar júzege asyrylmaq.
- Osy oraıda, mýzeı salasynda qajyrly eńbek etip júrgen barsha mamandarǵa – eren eńbekterińiz, janashyrlyqtaryńyz, shyǵarmashylyq izdenisterińiz ben mamandyqqa degen adaldyǵyńyz úshin shynaıy rızashylyǵymdy bildiremin!
Qurmetti dostar!
Merekelerińiz qutty bolsyn! Árbir mýzeıge saparyńyz tyń tanym men erekshe áserge toly bolǵaı!, -dedi Aıda Balaeva.
Osyǵan deıin Almaty mýzeılerine kelýshiler sany úsh ese artqany týraly jazdyq.