Qazaqstan mýzeıleri ekskýrsııalyq qyzmettiń ózekti máselelerin talqylady
NUR-SULTAN. QazAqparat – QR Ulttyq mýzeıinde ekskýrsovodtardyń «Qoljetimdi mýzeı: ekskýrsııalyq qyzmettegi ınnovatsııalar» atty onlaın dóńgelek ústeli ótti, dep habarlaıdy QazAqparat.
Onlaın kezdesýde Qazaqstandaǵy mýzeı ekskýrsovodtary arasyndaǵy tájirıbe almasý, olardy mýzeı isiniń ózekti máselelerin sheshýge tartý jáne ǵylymı baılanystardy damytý kózdelgen.
Ulttyq mýzeı dırektorynyń orynbasary Abaı Satybaldınniń aıtýynsha, dóńgelek ústel jumysy úsh baǵytta usynylǵan: «Pandemııa kezindegi mýzeı: ekskýrsııalardyń ózgerýi jáne jańa tehnologııalardy qoldaný»; «Erekshe qajettilikteri bar adamdarǵa ekskýrsııalar: problemalar, negizgi mindetter jáne ádister» jáne «Ekskýrsııalyq qyzmetti ádistemelik súıemeldeý».
«Teatr kıim ilgishten bastalsa, mýzeı ekskýrsovod qyzmetinen bastalýy kerek. Ekskýrsovodtar bilimdi, ádepti, sypaıy, kópshil, adamdardy qyzyqtyra alatyn qabiletterdi boıyna jınaqtaýy tıis. Bıyl álemniń barlyq elin jaılaǵan koronavırýs saldarynan mýzeı kelýshileriniń azaıyp ketkeni belgili. Kelýshiler azaıǵan jaǵdaıda ekskýrsııa júrgizýshisine qoıylatyn talaptyń da artary sózsiz. Sondyqtan ekskýrsııalyq qyzmetker qatysty birqatar máseleni talqylaý úshin biz Qazaqstannyń barlyq óńirlik mýzeılerin jınadyq», - deıdi A. Satybaldın.
Sonymen birge, dóńgelek ústelge QR eńbek sińirgen ekskýrsovod, ıÝNESKO ulttyq jattyqtyrýshysy Baqyt Orazymbetova da qatysty.
«Men bul salada 40 jyldan astam ýaqyt jumys istep kelemin. Aldaǵy ýaqytta da halyqtyń mýzeıge suranysy kóbirek bolatynyn túsinemin. Mýzeı qaýymdastyǵynda jumys isteıtinderdiń barlyǵy keminde bir ret Máskeýdegi «Intermýzeı» festıvaline qatysýy kerek dep oılaımyn. Bul qor, qalpyna keltirý jumystarynyń tájirıbesi jınaqtalǵan álemdik alań. Al mýzeıdiń fýnktsııalary qor jumysyna, zertteý jumysyna jáne halyqqa barlyq jumysty kórsetýge tikeleı qatysty», - deıdi Baqyt Orazymbetova.
Sonymen birge, dóńgelek ústelde Ulttyq mýzeıdiń «Uly Dalanyń ejelgi óneri men tehnologııalary» zalynyń teatrlandyrylǵan ekskýrsııasy kórsetildi.
