Qazaqstan musylmandary dinı basqarmasynyń tóraǵasy Germanııanyń bas konsýlymen júzdesti
ASTANA. 3 sáýir. QazAqparat - Qazaqstan musylmandary dinı basqarmasynyń tóraǵasy Erjan qajy Malǵajyuly Germanııanyń Almatydaǵy bas konsýly Mıhael Graýdy qabyldady.
Bul týraly QMDB-nyń baspasóz qyzmeti habarlady.
Bas múftı qonaqqa qazaq dalasyna Islam dininiń kelý tarıhyn, eldegi dinı ahýaldy baıandap berdi. Mıhael Graý Erjan qajy Malǵajyulyn jańa qyzmetimen quttyqtap, suhbat barysynda «Dinı basqarma dinı aǵymdarmen qalaı kúrespek?» - dep saýal tastady.
«Islamda zorlyq joq. Quranda Alla taǵala osylaı degen. Biz ózgelerdi kúshtep dinge ákelmeımiz nemese óz mázhabymyzdy ustanýǵa májbúrlemeımiz. Asyl dinimiz Islamdaǵy dástúrli baǵytymyz - Ábý Hanıfa mázhaby - demokratııalyq prıntsıpterge negizdelgen jol. Ol - bizdiń dástúrimizben, saltymyzben bite qaınasyp ketken mázhab. Dinı basqarmanyń din salasyndaǵy róli - bólshekteý emes, biriktirý. Musylmandardy múftııat tóńiregine toptastyrý. Aýyzbirshilikti arttyrý. «Іrimeıik, birigeıik» degen uran tastap, yntymaqqa úndeımiz. Múftııat - jazalaýshy organ emes. Kúshteý, májbúrleý - dinimizge jat. Biz kez kelgen din ókilimen dıalog jasaýǵa múddelimiz. Túsindirý, nasıhat aıtý, úlgi bolý - maqsatymyz. Ur da jyq minez - musylmanǵa, din ókiline jaraspaıdy», dep baıypty jaýap qaıtardy Bas múftı.
Mıhael Graý Bas múftıge salıhaly suhbaty úshin alǵysyn bildirip, rızashylyǵyn jetkizdi.
