Qazaqstan Musylmandary dinı basqarmasynda Elbasynyń Joldaýy talqylandy
ASTANA. 1 naýryz.QazAqparat /Gúlmıra Álıakparova/ - 28 aqpanda Qazaqstan Musylmandary dinı basqarmasynda Elbasy N.Á.Nazarbaevtyń «Bolashaqtyń irgesin birge qalaımyz!» atty Joldaýynyń basymdyqtary talqylandy.
Shara barysynda QR Mádenıet mınıstrligi Dinı ister komıtetiniń tóraǵasy Ardaq Dosjan Joldaýdyń basymdyqty baǵyttaryn ortaǵa saldy. Onyń aıtýynsha, aldaǵy ýaqytta din mamandaryn oqytyp daıarlaýǵa memleket tarapynan qamqorlyq kórsetiletin bolady. Bilim beretin jańa oqý korpýstary salynyp, stýdentter jataqhanalarmen qamtamasyz etiledi. Nur-Múbarak Islam mádenıeti ýnıversıtetin zaman aǵymyna sáıkestendirý arqyly ondaǵy bilim sapasyn kóterý kózdelip otyr.
Sondaı-aq A.Dosjannyń sózine qaraǵanda, taıaý ýaqytta joǵary jáne arnaýly dinı oqý oryndarynyń shákirtterine arnalǵan oqýlyqtar men qajetti ádebıetter mol taralymmen jaryq kóredi. Onymen birge, meshitter qyzmeterinde týyndaǵan máselelerdi sheshýmen budan bylaı jergilikti - aýdandyq, qalalyq jáne oblystyq din komıtetteri aınalysady. Jańa meshitter kez-kelgen jerde emes, onyń jobasy aldyn ala sol eldi mekenniń bas josparyna engizilip, bólingen jer teliminde ǵana salynatyn bolady.
Óz kezeginde QMDB tóraǵasy, Bas múftı, sheıh Ábsattar Derbisáli Joldaýdan týyndaıtyn birqatar ózekti máselelerdi tilge tıek etip, olardy sheshýdiń tıimdi joldary týraly oıymen bólisti.
