Qazaqstan musylmandary dinı basqarmasy tóraǵasy Ramazan aıynda azyq-túlik baǵasyn 10 paıyzǵa arzandatýdy usynýda

ALMATY. 18 maýsym. QazAqparat - Bıyl kúlli musylman qaýymynyń  aýyz bekitip, 30 kún oraza ustaıtyn qasıetti Ramazan aıy 20 shildede bastalady. Bul týraly búgin Almatyda «Otandy súıý - ımannan» degen taqyryppen ótken  medıaforýmda sóz boldy.

«Ramazan aıynda saýda oryndarynda araq-sharap satýǵa tyıym salynsa. Qınalyp, taryǵyp júrgenderdi qoldaý maqsatynda azyq-túlik, kıim-keshek baǵasyn 10 paıyzǵa tómendetse degen usynys jasaımyz. Eger birte-birte  avtobýs, poıyz, ushaq sııaqty qoǵamdyq kólikterde jolaýshylar tasymalynyń barlyq  túrlerinde osy aıda jolaqy baǵalaryn  tómendetsek ıgilikti is bolar edi», - deıdi Qazaqstan musylmandary dinı basqarmasynyń  tóraǵasy, Bas múftı, sheıh Ábsattar qajy Derbisáli.  Bas múftıdiń aıtýynsha,  bul másele boıynsha endi 25 maýsymda oblystardaǵy bas ımamdar Almatyǵa shaqyrylyp, tapsyrma berilmek.

Ábsattar qajy: «Qazaqstandaǵy musylman qaýymy  26 ult pen ulys ókilderinen turady eken. Sondyqtan bul usynysty 26 tilge aýdardyq. Jurtshylyq arasynda taratý úshin. Budan halqymyzǵa eshqandaı zııan kelmes dep oılaımyz. Bul bastamaǵa Tatarstan Prezıdenti Rústem Mınnıhanov da úlken  qyzyǵýshylyq bildirip otyr. Biz de halyqqa osyndaı usynys jasap kóreıik dep mátinin surap aldy», - degendi aıtyp otyr.