Qazaqstan musylmandary dinı basqarmasy el boıynsha 30 myń kóshet otyrǵyzbaq
QMDB-nyń «30 jyldyq mereıtoıyna 30 myń túp aǵash otyrǵyzý» aktsııasyna dinı basqarma tóraǵasy, Bas múftı Naýryzbaı qajy Taǵanuly qatysty.
«Báıterek» monýmenti mańyndaǵy saıabaqta bastaý alǵan ıgi shara elimizdiń barlyq aımaǵynda meshit qyzmetkerleri jáne turǵyndardyń qoldaýymen jalǵasty.
«Paıǵambarymyz (oǵan Allanyń salaýaty men sálemi bolsyn) bir ósıetinde: «Qoldaryńda bir qurma aǵashynyń shybyǵy bolyp, qııamet kelgen jaǵdaı bolsa da sony otyrǵyzyp úlgerińder» - degen. Bul hadısten aǵash otyrǵyzýdyń mańyzdylyǵyn, tabıǵatty qorǵaýdyń, mańaıymyzdy kógaldandyrýdyń qanshalyqty saýaby bar ekenin túsinýge bolady. «Atadan mal qalǵansha, tal qalsyn» degen de ata-babalarymyzdyń sózi bar. Memleket basshysy Qasym-Jomart Toqaev bıylǵy Joldaýynda el aýmaǵyn kógaldandyrýǵa qatysty aldaǵy bes jylda orman alqaptarynda 2 mıllıardqa jýyq aǵashtyń, al eldimekenderde 15 mıllıonǵa jýyq aǵash otyrǵyzylatynyn aıtyp ótti...Elordada bastalǵan sharamyz bir mezette óńirlerdiń ımamdary jáne jamaǵatynyń atsalysýymen jalǵasady», - dedi Naýryzbaı qajy Taǵanuly.
Aıta keteıik, QMDB-nyń qurylǵanyna 30 jyl tolýyna baılanysty jer-jerde 30 jetim balaǵa, 30 otbasyna qaıyrymdylyq kómek kórsetý, 30 eldi mekenniń aýyzsý, jol-kópir máselesin sheshýge yqpal etý, tarıhı kórmeler uıymdastyrý, QMDB týraly derekti fılm túsirý, ál-Farabı, Abaı syndy tulǵalardyń, el ishinde esimi elenbeı júrgen 30 din qaıratkeriniń esimin meshitke berý, aýyldaǵy 30 meshitti kúrdeli jóndeýden ótkizý jáne ózge de saýapty da salaýatty sharalardy júzege asyrý josparǵa engizilgen.
Osy bastama aıasynda búgin Nur-Sultan qalasynyń saıabaqtaryna 332 túp aǵash otyrǵyzylady. Al respýblıka boıynsha eń kóbi Túrkistan oblysynda 8228 túp aǵash tamyr jaımaq.
