Qazaqstan musylmandary dinı basqarmasy Astanaǵa kóshedi
ASTANA. QazAqparat - Bas múftı Erjan qajy Malǵajyulynyń tóraǵalyǵymen ótken alqaly jıynda osyndaı sheshim qabyldandy. Bul týraly Dinı basqarmanyń baspasóz qyzmeti habarlady.
«Jaqynda Qazaqstan musylmandary dinı basqarmasy Apparatynyń negizgi quramyn Astanaǵa kóshirýimiz qajet. Bul - Dinı basqarma úshin mańyzdy qadam. Astanada jumys qarqynyn kúsheıtemiz. Mundaı tarıhı sheshim bárimizge úlken jaýapkershilik júkteıdi. Elordada Dinı basqarmanyń jańa ǵımaratynyń qurylysy bastalǵanyna qaramastan, ýaqytsha keńse tabýdy naıb múftı Serikbaı qajy Oraz ben Apparat jetekshisi Ǵylymbek Májıevke tapsyramyn», - dedi Erjan qajy Malǵajyuly.
Alqaly jıynda Bas múftı Almatydaǵy ǵımaratta jumys júıeli júrgizile beretinin baıandady. «Keıbir adamdar Dinı basqarma birtutas kóshetin bolypty deıtin kórinedi. Olaı emes. Mádenı, ádebı, dinı oshaǵymyz - Almaty árqashan múftııat úshin mańyzdy. Osyndaǵy ǵımaratta da jumys isteıtin bolamyz», - dedi Bas múftı.
Basqosýda Erjan qajy Malǵajyuly osynaý ıgi bastamalar men din salasyndaǵy tarıhı oqıǵalar halqymyzdyń darhan minez, dosqa qamqor keńpeıil nıetiniń, ulttar tatýlyǵynyń hám birliginiń arqasynda júzege asyp jatqanyn aıtty. Yntymaq bolsa, yrys ta, bereke de bolatynyn tilge tıek etti. Bas múftı qyzmetkerlerge jumysty óndirip istep, jaýapty kezeńde belsendilik tanytýǵa úndedi.
