«Qazaqstan murajaılar odaǵy» jáne «Qazaqstannyń etnologtary men antropologtary qaýymdastyǵy» qurylmaq

Bul jaıly búgin Almatyda ótip jatqan "І Arǵynbaev oqýlary" halyqaralyq konferentsııasynda málim boldy,  dep habarlaıdy QazAqparat.

Ony  Qazaqstan memlekettik ortalyq murajaıy men Shoqan Ýálıhanov atyndaǵy tarıh jáne etnologııa ınstıtýty birigip uıymdastyrǵan bolatyn. Eki kúndik bul sharaǵa Qazaqstan murajaılarynyń basshylary,  ǵylymı qyzmetkerleri, joǵary oqý oryndarynyń ǵalymdary jáne Qyrǵyzstan, Ózbekstan, Reseı, Qytaı sııaqty elderden kelgen    etnograftar, tarıhshylar   qatysýda. Konferentsııa jumysy  «Etnologııa ǵylymynyń teorııalyq-ádistemelik, derektanýlyq jáne tarıhnamalyq máseleleri», «Tarıhı jáne qazirgi etnologııa máseleleri», «Murajaı - ǵylymı-zertteý ınstıtýty» dep atalatyn sektsııalar boıynsha ótpek. Konferentsııa sońynda endi «Qazaqstan murajaılar odaǵy» jáne  «Qazaqstannyń etnologtary men antropologtary qaýymdastyǵy» qurylady dep josparlanyp otyr. Etnograf Serik Ájiǵalıdyń aıtýynsha, bul sharanyń Halel Arǵynbaev oqýlary aıasynda júzege asýy kezdeısoq emes. Qazaqstan men Ortalyq Azııanyń tarıhı-etnografııalyq atlasyn quraýshylardyń biri sanalatyn ǵalymnyń esimi  ǵylym áleminde  iltıpatpen atalady.