Qazaqstan muraǵat qujattaryn elektrondyq úlgide kórýge múmkindik beretin jobany qolǵa aldy - E. Júnisov
ASTANA. 9 qarasha. QazAqparat /Jasulan Amanbaıuly/ - Qazaqstanda Ulttyq muraǵat bazasynda muraǵat isiniń biryńǵaı aqparattyq júıesi engiziledi.
Bul týraly búgin Astanada Ulttyq muraǵat qabyrǵasynda ótken konferentsııada Aqparat jáne muraǵat komıteti Muraǵat jáne qujatnama basqarmasynyń bastyǵy Ermek Júsipov málim etti.
Elimizde qazirgi ýaqytta 230 memlekettik muraǵat mekemesi bar. Olarda sońǵy 4 ǵasyrǵa tıesili 20 mln-ǵa tarta tarıhı qujattar saqtaýly. Biryńǵaı aqparattyq júıe arqyly árbir paıdalanýshy ınteraktıvti rejimde ol qujattardyń elektrondyq úlgisine qol jetkize alady.
«Biz búgingi tańda tuńǵysh ret aldymyzǵa muraǵat isiniń biryńǵaı aqparattyq júıesin qurý maqsatyn qoıyp otyrmyz. Ulttyq muraǵat bazasy yńǵaıly bolǵandyqtan, bul júıeniń ilki jobasy aldymen osy mekemede engiziledi. Keıin bul basqa da memlekettik muraǵat mekemelerine taratylady. Soǵan baılanysty búgin muraǵat qyzmetkerlerin jınap, olarǵa atalǵan jobanyń qalaı jumys isteıtinin kórsetetin bolamyz», - deıdi E. Júnisov.
Onyń aıtýynsha, joba 3 jyl kóleminde iske asyrylady. Júıe oblystardaǵy muraǵattarda qoldanylyp júrgen lokaldy aqparattyq aǵymdy biryńǵaılandyryp, ortaq arnaǵa toǵystyrady. Qazaqstanda 20 mıllıon muraǵat qujattarynyń tek 5-6 paıyzy elektrondyq túrge kóshirilgen. Joba aıasynda elektrondyq qujat aınalymyn júrgizý, qujattardy elektrondyq túrge kóshirý jáne ony saqtaý tájirıbeleri óz sheshimin tabatyn bolady.
«Búgingi kúni muraǵat qujattaryn paıdalaný ádisteri jáne saqtaý tásilderi eskirdi dese de bolady. Biz muraǵat isi salasyna jańa aqparattyq tehnologııalardy engizýimiz kerek. Bul óz kezeginde 20 mıllıon is pen qujat arasynan paıdalanýshylarǵa qajetti maǵlumattardy ınteraktıvti rejimde shapshań izdep taýyp berýimizge múmkindik beredi», - deıdi Muraǵat jáne qujatnama basqarmasynyń bastyǵy Ermek Júsipov.
