Qazaqstan munaıyn óndirýdegi Qytaıdyń úlesi byltyr 22 paıyzdy qurady - Saýat Myńbaev
ALMATY. 26 mamyr. QazAqparat /Erlik Erjanuly/ - Qazaqstan naryǵyndaǵy tek Qytaıdyń ǵana emes, kez-kelgen eldiń kompanııalarynyń úlesine monıtorıng júrgizilýi qajet. Bul jaıynda búgin Almatyda ótken "Qazaqstandaǵy sheteldik ınvestıtsııalar: tájirıbe, mindet jáne keleshek" dep atalatyn dóńgelek ústel jıynynda aıtyldy.
"Munaı óndirýde Qytaıdyń úlesi týraly ártúrli sandar aıtylady. 2010 jyly ol 22 paıyzdy qurady. Qytaı kompanııalary ıelik etetin aktıvterdiń úlesi aldaǵy ýaqytta azaıatyn bolady. Bul kenishterdegi ónim óndirý kóleminiń tómendeýine baılanysty oryn almaq. Máselen, "AqtóbeMunaıgaz" kompanııasyndaǵy kelisimderiniń merzimi 2017-jyly aıaqtalady", - deıdi Munaı jáne gaz mınıstri Saýat Myńbaev.
Onyń aıtýynsha, elimizde sheteldik kompanııalardyń úlesine monıtorıng júrgizýdiń quqyqtyq ádisteri bar. Zańda strategııalyq aktıvter qarastyrylǵan. Qazaqstan naryǵynda jumys jasaıtyn sheteldik kompanııalar ony Úkimettiń kelisimi men sheshiminsiz basqa kompanııaǵa sata almaıdy. Tabıǵat paıdalaný týraly zańda da aktıvterdi satyp alýda memlekettiń basym quqyǵy kórsetilgen.
