Qazaqstan munaıy áli 100 jylǵa jetedi – Energetıka mınıstrligi

ASTANA. QazAqparat –Energetıka mınıstri Almasadam Sátqalıev BAQ ókilderiniń saýalyna jaýap bere otyryp, eldegi munaı qory týraly málimet aıtty, dep habarlaıdy QazAqparat tilshisi.

«Aldyn ala boljamdar boıynsha munaı 100 jylǵa anyq jetedi. Biraq bizde perspektıvaly bloktar bar. Úkimet Memleket basshysynyń qoldaýymen jańa modeldegi kelisimshart daıyndady. Ol boıynsha jańa munaı kenishterine barlaý jasaǵandarǵa salmaqty jeńildikter usynylady. Kóptegen kompanııalar ol jeńildikti paıdalandy da. Jeke aıtsaq, «Lýkoıl» sondaı kelisimshartqa qol qoıdy», - dedi Almasadam Sátqalıev.

Onyń málimetinshe, Ázerbaıjan tarapy da Qazaqstan aýmaǵynda munaı qoryn barlaýǵa atsalysýǵa nıetti.

«Ázerbaıjan Prezıdenti Ilham Álıevtiń sapary kezinde Baký delegatsııasy Qazaqstanǵa ınvestıtsııa salýǵa nıet bildirdi. Olar kómirsýtek kózderin barlaý, ıgerý týraly jańa máselelerdi kóterdi. Qazir energııaǵa degen suranystyń artyp kele jatqanyn eskersek, resýrs bazasyn tolyqtyrýǵa qarajat jumsaýdy jalǵastyrýymyz kerek», - dedi mınıstr.