Qazaqstan munaıy álemdik naryqqa joǵary baǵamen satylyp jatyr - U. Qarabalın

ASTANA. QazAqparat - Qazaqstan munaıy álemdik naryqta joǵary baǵamen satylýda. Búgin Ortalyq kommýnıkatsııalar qyzmetinde ótken brıfıng barysynda jýrnalıster saýalyna jaýap bergen Energetıka birinshi vıtse-mınıstri Uzaqbaı Qarabalın osylaı málimdedi.

«Qazaqstannyń munaıynyń eksporttyq baǵasyna kelsek, qazirgi kúni bul barreline shamamen 54,3 dollardy quraıdy. Jalpy munaı satylǵanda munaıdy tasymaldaý zańnamasyna sáıkes, bekitilgen baǵadan kóp mólsherde tómen túsirýge ruqsat etilmeıdi. Bul baqylaýda turady. Sol turǵydan alsaq, Qazaqstannyń munaıy qashanda joǵary baǵamen ketip jatyr», - dep atap ótti Uzaqbaı Qarabalın.

Budan bólek, vıtse-mınıstr «QazMunaıGaz» kompanııasy ózine tıesili janar-jaǵarmaı stansalaryn jekege satady» degen aqparatqa da túsinik berip ótti.

«QazMunaıGaz» aktsıonerlik qoǵam bolǵandyqtan, memleket qazynasynyń qaraýyndaǵy qoǵam. Sondyqtan olardyń sheshimi qabyldanyp jatsa, bul naryqqa áser etip, elde janarmaı tapshylyǵyna ushyratpaıtyn bolsa, bul olardyń ózderiniń quqy bolyp tabylady. Degenmen, bizge qazir ondaı aqparat túsken emes. Másele qoıylsa ol úkimet organdarynda da talqylanyp qaralýy tıis», - dedi U. Qarabalın.