Qazaqstan munaıynyń Germanııaǵa jetkizilimi 25 paıyzǵa artty

ASTANA. KAZINFORM — Qazan aıynda «Drýjba» munaı qubyry arqyly Germanııaǵa qansha kólemde munaı jóneltilgeni belgili boldy. 

— Bıyl qazanda «QazTransOıl» AQ Germanııaǵa ári qaraı jetkizý úshin «Adamova zastava» munaı tapsyrý pýnkti baǵyty boıynsha «Transneft» JAQ magıstraldyq munaı qubyrlary júıesine 225 myń tonna qazaqstandyq munaı tapsyrdy, — delingen «QazTransOıl» AQ-nyń baspasóz qyzmeti taratqan habarlamada.

Aqparatta aıtylǵandaı, qyrkúıekte Germanııaǵa «Adamova zastava» baǵyty boıynsha 180 myń tonna qazaqstandyq munaı jetkizilgen.

— Qarashada «QazTransOıl» AQ Energetıka mınıstrliginiń munaı tasymaldaý kestesine sáıkes, júk jóneltýshilerdiń naqty munaı tapsyrýy jaǵdaıynda qazaqstandyq munaıdy eksportqa jóneltýdi jalǵastyrýdy josparlap otyr, — deıdi kompanııadan.

Eske sala ketsek, ótken jyly QazTransOıldyń munaıdy eksportqa tasymaldaýǵa qatysty tarıfi ósetini belgili boldy.