Qazaqstan munaıynyń Germanııaǵa eksporty artatyn boldy ma

ASTANA. KAZINFORM — Qazaqstannan Germanııaǵa munaı eksportyn eki ese arttyrý jospary oryndala ma? Bul suraqqa Energetıka mınıstrligi jaýap berdi.

- Qazaqstan Respýblıkasynyń munaıyn eksporttaýdyń qosymsha baǵyttaryn damytý barysynda 2022 jyly Ázerbaıjan Respýblıkasymen jylyna 1,5 mln tonna munaı tasymaldaýǵa kelisimge qol qoıyldy. «Baký – Tbılısı – Djeıhan» baǵyty boıynsha 2024 jyldyń qorytyndysyna sáıkes 1,4 mln tonnadan astam qazaqstandyq munaı tasymaldandy, - delingen mınıstrliktiń Kazinform agenttigine bergen jaýabynda.

Sonymen qatar Qazaqstan, Germanııa jáne Reseı taraptarynyń arasyndaǵy kelisimderdiń aıasynda 2024 jyly 1,5 mln tonna qazaqstandyq munaı Germanııadaǵy «Shvedte» munaı óńdeý zaýytyna tasymaldandy.

- Buǵan deıin Germanııa jaǵy «Shvedte» zaýytyna munaı jetkizýdi jylyna 2 mln tonnaǵa deıin arttyrýǵa qyzyǵýshylyq bildirgen bolatyn. Qazirgi ýaqytta bul másele qarastyrylyp jatyr. Aıta ketý kerek, Qazaqstan munaıy eksporttyq baǵyttarda jetkizilýi marshrýttyń kommertsııalyq tartymdylyǵyna jáne sýbektilerdiń arasyndaǵy kelisimderge baılanysty bolady, - dep atalyp ótken vedomstvo aqparatynda.

Eske salsaq, byltyr Germanııa Qazaqstannan jetkiziletin munaı kólemin arttyrýdy surady.