Qazaqstan munaıynyń Eýropaǵa tranzıtine shekteý qoıý týraly resmı habarlama túsken joq - Energetıka mınıstrligi
ASTANA. KAZINFORM – QR Energetıka mınıstrligi «Drýjba» munaı qubyry júıesi arqyly Germanııaǵa munaı tranzıtine qatysty BAQ-ta taraǵan aqparatqa túsinikteme berdi.
Vedomstvo málimetinshe, qazirgi ýaqytta reseılik taraptan Atyraý – Samara – «Drýjba» baǵyty boıynsha qazaqstandyq munaı tranzıtine qandaı da bir shekteýler engizilgeni týraly resmı habarlama túspegen.
– Qazirgi ýaqytta reseılik taraptan Atyraý – Samara – «Drýjba» munaı qubyry baǵyty boıynsha qazaqstandyq munaı tranzıtine qandaı da bir shekteýler týraly resmı aqparat túsken joq, – dep habarlady mınıstrlik.
Sonymen qatar beıresmı derekterge sáıkes, reseılik taraptyń tehnıkalyq múmkindikteriniń shekteýli bolýyna baılanysty aǵymdaǵy jyldyń 1 mamyrynan bastap atalǵan baǵyt boıynsha munaı aıdaý ýaqytsha múmkin bolmaıdy.
– Tehnıkalyq shekteýler joıylǵannan keıin qazaqstandyq munaı tranzıti qaıta jandanady dep kútilýde, – delingen habarlamada.
Aıta keteıik, buǵan deıin vedomstvo Koreıaǵa munaı eksportynyń naqty kólemi aıqyndalmaǵanyn habarlaǵan edi.
