Qazaqstan munaıyn tasymaldaıtyn eki tankerge dronmen shabýyl jasady
ASTANA. KAZINFORM — Kaspıı qubyr konsortsıýmynyń teńiz termınalynda Qazaqstan munaıyn tasymaldaıtyn eki tankerge dronmen shabýyl jasady. Shıki munaıdy tıeý toqtatyldy, eshkim zardap shekken joq, dep habarlaıdy CPC.
Konsortsıýmnyń habarlaýynsha, oqıǵa 19 shildede VPU-1 jáne VPU-3 qondyrǵylarynda júk tıeý operatsııalary kezinde bolǵan. Shabýyldyń maqsaty Lıberııa týynyń astyndaǵy ASIA tankerleri jáne Marshall araldarynyń týynyń astyndaǵy NISSOS IOS boldy.
ASIA kemesine «Teńizshevroıl» kompanııasynyń munaıy, NISSOS IOS-qa Qashaǵan B.V. jáne «Maten» kompanııalarynyń shıkizaty, onyń ishinde «Qazmunaıgaz» UK AQ-nyń qatysýymen tıeldi. Bortta halyqaralyq ekıpajdar bolǵan.
Shabýyl nátıjesinde ASIA tankerinde órt shyqty. Ony KQK avarııalyq-qutqarý kúshterin tarta otyryp sóndirýge qol jetkizdi.
Munaı tıeý toqtatyldy. Konsortsıým qyzmetkerleri, merdigerlik uıymdar men ekıpaj músheleri arasynda qurbandar men zardap shekkender joq.
Munaıdyń tógilýi bolǵan joq, eki tanker de kótergishtigin saqtap qaldy. Qazirgi ýaqytta mamandar keltirilgen zalaldy baǵalaıdy.
KQK bul oqıǵany maqsatty terrorıstik shabýyl dep atady jáne bul konsortsıýmnyń azamattyq ınfraqurylymyna qarsy tikeleı agressııanyń besinshi oqıǵasy ekenin aıtty.
Kaspıı qubyr konsortsıýmy munaıdy Teńiz, Qashaǵan jáne Qarashyǵanaq ken oryndarynan tasymaldaıdy. Uzyndyǵy 1511 shaqyrym bolatyn Teńiz — Novorossıısk qubyry arqyly Qazaqstannyń eksporttyq munaıynyń úshten ekisinen astamy ótedi. 2025 jyly aýystyryp tıeý kólemi shamamen 70,5 mln tonna boldy.
Aıta keteıik, QR Energetıka mınıstrligi 2026 jylǵy 13 qańtarda Qara teńiz akvatorııasynda, Kaspıı qubyr konsortsıýmy teńiz termınaly mańynda Qazaqstannyń eksporttyq munaıyn tasymaldaýǵa qatysqan eki kemede tirkelgen keleńsiz oqıǵalar týraly aqparatty resmı túrde rastaǵan edi.
