Qazaqstan munaıyn tasymaldaýdyń qosymsha baǵyttary iske qosylady - mınıstrlik
ASTANA. KAZINFORM – QR Energetıka mınıstri Almasadam Sátqalıev Qazaqstan munaıyn tasymaldaý baǵyttaryna túsinik berdi.
«Qazir Kaspıı qubyry konsortsıýmy (KQK) Qazaqstan munaıyn eksporttaýdyń eń senimdi jáne tıimdi baǵyty sanalady. Jobany ázirleýdiń barlyq kezeńderi boıynsha ınvestıtsııanyń jalpy kólemi 8,4 mlrd dollardan astam qarjyny qurady. Búgingi tańda ótkizý kólemin jylyna 67 mln tonnadan 81,5 mln tonnaǵa deıin arttyrýǵa tehnıkalyq múmkindik bar, onyń ishinde Qazaqstan ýchaskeci úshin jylyna 53,7 mln-nan 72,5 mln tonnaǵa deıin. 2024 jylǵa arnalǵan eksporttaý boljamy shamamen 88,4 mln tonna munaı óndirý kezinde 68,8 mln tonna bolýy múmkin», - dedi A.Sátqalıev.
Parlament Májilistegi Úkimet saǵatynda munaı salasyn damytýdy talqylaý kezinde.
Bul turǵyda negizgi baǵyttar:
- Kaspıı qubyry konsortsıýmy – 55,4 mln tonna munaı;
- Atyraý-Samara – 8,6 mln tonna;
- Qytaı – 1,1 mln tonna;
- Aqtaý porty – 3,6 mln tonna;
- Temirjol arqyly – 0,05 mln tonna.
Sonymen qatar, 2024 jyly Reseı munaıyn tranzıttik tasymaldaý jospary aıasynda Qytaıǵa 10 mln tonna, Ózbekstanǵa 200 myń tonna eskerilgen.
«Bul rette 2023 jyldan bastap Germanııadaǵy Shvedt munaı óńdeý zaýytyna «Drýjba» júıesi boıynsha jetkizilimder de júrgizildi. Bıyl Shvedtke 1,4 mln tonna munaı eksporttaý josparlanǵan. Sonymen qatar munaı óndirýdiń ósýin jáne jańa teńiz jobalaryn iske qosýdy eskere otyryp, orta merzimdi perspektıvada mınıstrlik «QazMunaıGazben» jáne basqa da múddeli taraptarmen birlesip, qosymsha tasymaldaý marshrýttaryn, onyń ishinde Transkaspıı halyqaralyq kólik joly boıymen tasymaldaýdy damytýdy qarastyryp otyr. Qazirgi ýaqytta «Baký – Tbılısı – Jeıhan» baǵyty eń perspektıvaly baǵyttardyń biri sanalatynyn aıta ketý kerek. Óıtkeni osy baǵyttaǵy Qazaqstan munaıyn jetkizý kólemin damytýǵa jáne júıeli túrde arttyrýǵa bizdiń tarapymyzdan da, ázerbaıjandyq áriptesterimizdiń tarapynan da qyzyǵýshylyq bar», - dedi mınıstr.
Onyń sózine qaraǵanda, 2024 jylǵa «Baký – Tbılısı – Jeıhan» marshrýty arqyly 1,5 mln tonna Qazaqstan munaıyn jetkizý josparlanǵan. Osy marshrýt boıynsha jetkizý kólemin jylyna 20 mln tonnaǵa deıin ulǵaıtý perspektıvalary zerttelip jatyr. Atap aıtqanda, «Baký – Sýpsa» munaı qubyrynyń múmkindikteri de qarastyrylyp otyr. Ótkizý qabileti jylyna 5 mln tonnany quraıdy, jetkiziletin kólem jylyna 3 mln tonnaǵa deıin bolýy múmkin. Bul marshrýtty paıdalaný máselesi pysyqtalyp jatyr.
«Uzaq merzimdi perspektıvada «Eskene – Quryq» munaı qubyryn salý máselesi de pysyqtalyp otyr. Munaı qubyrynyń boljamdy tehnıkalyq qýaty shamamen jylyna 20-30 mln tonna bolady», - dedi vedomstvo basshysy.
Budan buryn habarlanǵandaı, 2026 jyldan Qazaqstanda munaı óndirý kólemi 100 mln tonnadan asady.