Qazaqstan munaıyn Reseı arqyly tranzıtteý Reseıdikin Qazaqstan arqyly tranzıtteýden nege qymbat
ASTANA. KAZINFORM – Energetıka mınıstrligi Kazinform saýalyna joldaǵan jaýabynda Qazaqstan munaıyn Reseı arqyly tranzıtteý Reseı munaıyn Qazaqstan arqyly tranzıtteý tarıfinen nege qymbat ekenin aıtty.
Energetıka mınıstrliginiń málimetinshe, Qazaqstan munaıy Reseı aýmaǵy arqyly 4 baǵytpen tranzıteledi:
- «Atyraý-Samara – Adamova Zastava baǵytynda munaı tasymaldaý tarıfi tonnassyna – 8557,7 teńge (29.03.2024 j baǵam boıynsha 19 dollar);
- Atyraý-Samara – Ýst-Lýga baǵytynda tonnasyna – 7272,9 teńge (29.03.2024 j baǵam boıynsha 16,2 dollar);
- Atyraý-Samara – Shesharıs baǵytynda tonnasyna – 6972,9 teńge (29.03.2024 j. baǵam boıynsha 15,5 dollar);
- KTK qubyry arqyly tasymaldaý tonnasyna – 38 dollar», - delingen jaýapta.
Eske salsaq, 27 naýryzda Májilis Reseı munaıyn Qazaqstan arqyly Qytaıǵa tasymaldaý kelisimine enetin ózgeristerdi maquldaǵan bolatyn. Bul kelisim boıynsha Reseı munaıyn Qazaqstan arqyly tranzıtteý tarıfi tonnasyna 2,1 dollar bolmaq.
«TON-2 munaı qubyry (Reseıdiń Týımazy qalasynan Qazaqstannyń Pavlodar qalasyna deıin) boıynsha aıtsaq, buǵan deıin 1 tonna munaıdyń tranzıtine 799,45 teńge alynyp kelgen. ıAǵnı, marshrýttyń tarıfi dollar baǵamyn 440 teńge dep eseptegende, tonnasyna 1,82 dollar bolatyn. Taraptar kelissózder kezinde atalǵan ýchaskedegi tarıfti tonnasyna 2,1 dollar etip belgileý týraly kelisimge qol jetkizdi. Bul qazir qoldanylyp júrgen tarıften joǵary», - delingen mınıstrliktiń málimetinde.
Demek, Qazaqstan munaıyn Reseı arqyly eksportqa shyǵarý tarıfi Reseı munaıyn Qazaqstan arqyly eksportqa shyǵarý tarıfinen 7-9 ese, al Kaspıı qubyr konsortsıýmy arqyly 19 ese qymbat. Munyń sebebin mınıstrlik eki eldiń zańnamasyndaǵy aıyrmashylyqtarmen baılanystyryp otyr.
«Qazaqstan Respýblıkasy men Reseı Federatsııasy zańnamalarynyń aıyrmashylyqtaryna baılanysty ár elde tranzıttiń baǵasy ártúrli», - delingen jaýapta.
Vedomstvo deregine qaraǵanda, 2023 jyldyń qorytyndysy boıynsha Qazaqstan Reseı Federatsııasy arqyly 65,8 mln tonna munaı tasymaldaǵan. Sonyń ishinde Kaspıı qubyr konsortsıýmy arqyly 56,6 mln tonna, Atyraý-Samara qubyrynyń úsh baǵyty arqyly 9,2 mln tonna munaı jóneltken.
