Qazaqstan munaıy tıelgen eki tankerge dron shabýyl jasady
ASTANA. KAZINFORM – Kaspıı qubyr konsortsıýmynyń (KQK) teńiz termınalynda Qazaqstan munaıyn tıeý kezinde eki tankerge ushqyshsyz ushý apparattarymen shabýyl jasaldy. Bul týraly QR Energetıka mınıstrligi málimdedi.
Mınıstrliktiń málimetinshe, oqıǵa 19 shildede «ASIA» jáne «NISSOS IOS» tankerlerine munaı tıeý operatsııalary kezinde bolǵan. Eki keme de Qazaqstanda óndirilgen munaıdy tasymaldaýǵa daıyndalyp jatqan. Tankerlerdiń bortynda halyqaralyq ekıpaj músheleri bolǵan.
– Shabýyl saldarynan tankerlerde órt shyqty. Alaıda ekıpajdardyń jedel is-qımylynyń arqasynda órt qysqa merzimde sóndirildi. Zardap shekkender joq. №1 jáne №3 qashyqtan tıeý qurylǵylary zaqymdanǵan joq. Teńiz akvatorııasyna munaıdyń tógilýine jol berilgen joq, – delingen Energetıka mınıstrliginiń habarlamasynda.
Vedomstvonyń málimetinshe, qazirgi ýaqytta oqıǵanyń saldaryn baǵalaý aıaqtalǵanǵa deıin termınalda munaı tıeý jumystary ýaqytsha toqtatyldy. Munaı jóneltýdi qaıta bastaý týraly aqparat keıinirek jarııalanady.
– Qazaqstan Respýblıkasy Energetıka mınıstrligi azamattyq maqsattaǵy asa mańyzdy energetıkalyq ınfraqurylym nysandaryna jasalǵan mundaı shabýyldardy jol berýge bolmaıtyn áreket dep sanaıdy. Halyqaralyq energetıkalyq ınfraqurylym nysandaryna kez kelgen kúsh qoldaný jahandyq energetıkalyq qaýipsizdikke qater tóndirip, energetıkalyq resýrstardyń úzdiksiz halyqaralyq saýda tetikterin buzady jáne jobaǵa qatysýshylardyń ekonomıkalyq múddelerine eleýli zııan keltiredi, – dep málimdedi mınıstrlik.
Aıta keteıik, byltyrǵy qarashada da KQK shabýylǵa ushyrap, júk tıeý-qabyldaý qurylǵysy zaqymdanǵany habarlandy.
