Qazaqstan munaıǵa táýeldilikti azaıtyp, óńdeý ónerkásibiniń ósýine ekpin qoıady — forým
ASTANA. KAZINFORM — Búgin Astana halyqaralyq forýmynda QR Ulttyq ekonomıka vıtse-mınıstri Arman Qasenov shıkizattyq emes sektorda basymdyq beriletin baǵyttardy atady.
— Jalpy ishki ónimdegi munaı salasynyń úlesi azaıyp keledi. Bul jaǵdaı basqa salalardyń, eń aldymen óńdeý ónerkásibiniń jyldam qarqynmen ósýine baılanysty baıqalyp otyr. Byltyr biz muny taǵy da is júzinde kórdik. Ózderińiz bilesizder, 2024 jyly Qazaqstanda munaı óndirý tipti tómendedi. Osyǵan qaramastan, ekonomıkanyń qalǵan bóligi joǵary qarqynmen ósti. Al ekonomıkanyń jalpy ósimi 4,8 paıyzdy qurady, — dedi A. Qasenov.
Vıtse-mınıstr óńdelgen ónimniń eksporty ósip kele jatqanyn aıta kele, byltyrǵy bul kórsetkish dollar ekvıvalentinde 12 paıyzǵa artqanyn jetkizdi.
— Óndirý deńgeıi (munaıdyń) tabıǵı faktorlarmen obektıvti túrde shektelgendikten, ol 5 jyldyń ishinde 105 mln tonna munaı deńgeıinde sharyqtaý shegine jetedi degen pikir bar. Byltyr biz shamamen 88 mln tonna munaı óndirdik, ıaǵnı ósim 17 paıyzben shekteldi. Obektıvti túrde munaı sektorynyń róli men úlesi tómendeı beredi. Bul rette qaı baǵytqa kóńil bólýimiz kerek? Birinshiden, JІÓ qurylymynda eńbek ónimdiligi joǵary bolýy tıis. Ekinshiden, eksportqa qabilettiligi joǵary salalar bolǵanyn qalaımyz. Ózderińiz biletindeı, Qazaqstanda shıkizatty óńdeıtin salalardyń úlesin aıtarlyqtaı arttyrýda áleýeti óte joǵary, — dedi ol.
Eske salsaq, byltyr elimiz 87,7 mln tonna munaı óndirdi.
2025 jylǵa arnalǵan munaı óndirý kólemi jobalyq qujattarǵa sáıkes 96,2 mln tonnany quraıdy.
Al 2026 jyldan bastap iri jobalardy júzege asyrý esebinen jyldyq munaı óndirý kólemi 100 mln tonnadan asady.