Qazaqstan munaı ónimderiniń eksportyn eki ese arttyrmaq
ASTANA. KAZINFORM — Qazaqstan munaı óńdeý kólemin arttyrýdy jáne shıki munaı óndirý men daıyn ónim shyǵarý boıynsha qazirgi araqatynasty birtindep ózgertýdi kózdep otyr. Bul týraly Úkimet otyrysynan keıin Energetıka mınıstri Erlan Aqkenjenov málim etti.
Onyń aıtýynsha, qazirgi ýaqytta elde jylyna shamamen 100 mln tonna munaı óndirilip, shamamen 19 mln tonnasy óńdeledi. Osylaısha, óndirilgen árbir bes tonna munaıdyń shamamen bir tonnasy óńdeledi.
— Sondyqtan Qazaqstanda jalpy qýattylyqty jylyna 40 mln tonnaǵa deıin arttyrýdy kózdeıtin munaı óńdeýdi damytý tujyrymdamasy ázirlendi, — dedi Erlan Aqkenjenov.
Osy oraıda ol óńdeý qýattylyǵynyń artýy Qazaqstanǵa kórshiles elderge daıyn ónim eksportyn ulǵaıtýǵa múmkindik beretinin aıtty.
— Reseı Federatsııasy men Qazaqstan Respýblıkasy óńirdegi tabıǵı resýrstarǵa baı elder ekeni jasyryn emes. Sondyqtan bolashaqta barlyq kórshimizdi joǵary sapaly motor otynymen eleýli kólemde qamtamasyz etý mindetin qoıyp otyrmyz. Buǵan qol jetkizý úshin biz óńdeý kólemin arttyryp, elimizdiń eksporttyq áleýetin kúsheıtýimiz qajet, — dedi mınıstr.
Aıta keteıik, Energetıka mınıstri bıyl tórtinshi munaı óńdeý zaýyty boıynsha naqty sheshim bolatynyn málim etti.
