Qazaqstan munaı óndirisin arttyrý úshin Qytaı tájirıbesin paıdalanbaq
ASTANA. KAZINFORM — Qazaqstan munaı ken oryndaryna jańa tehnologııalar engizýdi josparlap otyr, dep habarlaıdy Energetıka mınıstrliginiń baspasóz qyzmeti.
Astanada Qazaqstan men Qytaıdyń munaı-gaz ken oryndaryn ıgerýdiń tıimdiligin arttyrý jáne zamanaýı tehnologııalardy engizý máselelerine arnalǵan «Qazaqstan–CNPC» IV tehnıkalyq semınary ótti. Іs-sharaǵa Energetıka vıtse-mınıstri Erlan Akbarov qatysty.
Erlan Akbarov Qazaqstan men Qytaı arasyndaǵy dostyq pen strategııalyq áriptestikke negizdelgen yntymaqtastyqtyń munaı-gaz salasyn tehnologııalyq turǵydan damytýda áleýeti zor ekenin atap ótti. Onyń aıtýynsha, CNPC kompanııasymen ózara is-qımylǵa 30 jylǵa jýyq ýaqyt boldy. Osy kezeńde «Aqtóbemunaıgaz» AQ, PetroKazakhstan toby jáne «Mańǵystaýmunaıgaz» AQ aktıvterindegi munaı óndirýdiń jıyntyq kólemi 350 mln tonnadan asty. Jınaqtalǵan tájirıbe munaı óndirý tıimdiligin arttyrýǵa jáne jer qoınaýyn utymdy paıdalanýǵa baǵyttalǵan ozyq sheshimderdi odan ári engizýge negiz bolady.
Vıtse-mınıstr geologııalyq barlaý, geologııalyq modeldeý, munaı berýdi arttyrý, burǵylaý, geofızıkalyq zertteýler jáne ken oryndaryn ıgerýdi tsıfrlyq basqarý salalarynda zamanaýı tehnologııalardy tájirıbede qoldanýdyń mańyzdylyǵyn atap ótti.
Sondaı-aq ozyq tehnologııalardy Qazaqstan ken oryndarynyń erekshelikterine beıimdeý máselesine erekshe nazar aýdaryldy. Atap aıtqanda, Datsın ken ornynda qoldanylatyn núktelik sý aıdaý tájirıbesin paıdalaný múmkindikteri, Qalamqas ken ornynda polımerlik sý aıdaý tehnologııasyn engizý perspektıvalary, sondaı-aq gaz aıdaý, tutqyrlyǵy joǵary munaı ken oryndaryn ıgerý, qabatty gıdravlıkalyq jarý jáne gazlıft tehnologııalary qarastyryldy.
Erlan Akbarovtyń aıtýynsha, aldaǵy jumystyń mańyzdy baǵyttarynyń biri — resýrs bazasyn tolyqtyrý. Osyǵan baılanysty Kaspıı mańy oıpaty men Ońtústik Torǵaı basseıniniń geologııalyq áleýetin odan ári zertteý, sondaı-aq qoldanystaǵy óndiristik aktıvterdiń turaqty damýyn qamtamasyz etý qajet.
— Semınar qorytyndysy boıynsha 2027–2030 jyldarǵa arnalǵan tehnologııalardy engizýdiń birlesken josparyn ázirleý usynyldy. Qujatta naqty ken oryndary men pılottyq ýchaskelerdi, jaýapty oryndaýshylardy, qarjylandyrý kólemin, iske asyrý merzimderin jáne tıimdiliktiń ólshenetin kórsetkishterin aıqyndaý kózdeledi. Sonymen qatar synaqtardyń nátıjeliligin baǵalaý jáne tehnologııalardy ónerkásiptik deńgeıde qoldanýǵa kóshirý ólshemderin belgileý usynylady, — delingen mınıstrlik habarlamasynda.
Vıtse-mınıstr josparlanǵan is-sharalardy ýaqtyly qarjylandyrý men sapaly iske asyrýdyń mańyzdylyǵyna nazar aýdardy. Onyń atap ótýinshe, jer qoınaýyn utymdy paıdalaný, ken oryndarynyń óndiristik áleýetin saqtaý jáne tıimdi tehnologııalyq sheshimderdi engizý jolyndaǵy ortaq jaýapkershilik Qazaqstannyń munaı-gaz salasyn turaqty damytýdyń mańyzdy sharty sanalady.
Buǵan deıin álemdik munaı qaıtadan qymbattaǵanyn jazǵanbyz.
