Qazaqstan munaı óndirýdiń «TOP-12» álemdik reıtınginde uzaq merzimde qalýdy kózdeıdi

ASTANA. QazAqparat - Qazaqstan munaı óndirýdiń «TOP-12» álemdik reıtınginde uzaq merzimde qalýdy kózdeıdi. Bul týraly búgin Ortalyq kommýnıkatsııalar qyzmetinde ótken brıfıng barysynda Energetıka birinshi vıtse-mınıstri Uzaqbaı Qarabalın málim etti.

Brıfıng Elbasy aıqyndaǵan «100 qadam» Ult jospary aıasynda jer qoınaýyn paıdalaný salasyndaǵy ilgeri reformalar taqyrybynda ótken bolatyn.

Vıtse-mınıstrdiń sózine qaraǵanda, «100 qadam» Ult jospary aıasyndaǵy reformalar arqasynda elimizdiń geologııalyq barlaý salalaryna aldyńǵy qatarly tehnologııalar transferti qamtamasyz etiledi. Munaı jáne gazdy barlaý boıynsha perspektıvalyq baǵyttar ashylatyny kútiledi. Budan bólek, munaı-gaz salasyna, osy salamen baılanysty ekonomıkanyń servıstik, ınfraqurylymdyq baǵyttaryna ınvestıtsııalar tartý úshin jaǵymdy ahýal qalyptaspaq.

«Nátıjesinde elimizde dáleldengen paıdaly qazbalar qory eń keminde eki esege artady. Aıta keteıik, bul kórsetkish búgingi kúni 3,9 mlrd. tonnaǵa baǵalanyp otyr. Sonymen qatar, ekonomıkalyq qıyndyqtar yqtımaldyǵy jaǵdaıynda qaýipsizdikti qamtamasyz etýge septigin tıgizbek. Munaı óndirýdiń joǵary deńgeıin ustap turýǵa uzaqmerzimdi qoldaýlar jasalady jáne biz uzaq merzimde álemdik reıtıngte «TOP-12» tobynda qalýǵa nıettimiz», - dedi U. Qarabalın.

Onyń aıtýynsha, bes reforma aıasynda atqarylatyn sharalar munaı-gaz salasynyń ashyqtyǵyn qamtamasyz etip, paıdaly qazbalar kórsetkishiniń artýyna, Qazaqstandaǵy munaı-gaz salasyndaǵy barlaý, óndirý jumystaryna ınvestıtsııalyq klımattyń artýyna jol ashady.