Qazaqstan munaı óndirý kólemin arttyrady - Energetıka mınıstri

ASTANA. QazAqparat - Qazaqstan munaı óndirý kólemin arttyrady. Bul týraly Májilistegi Úkimet saǵatynda QR Energetıka mınıstri Qanat Bozymbaev málim etti, dep habarlaıdy QazAqparat.

«Orta merzimdi kezeńde iri jobalar eldiń ekonomıkalyq ósimine eleýli úles qosady. Munaı óndirý kólemi jyl saıyn ósetin bolady jáne 2025 jylǵa qaraı bul kórsetkish jyldyq mánde 104 mln tonnadan asady», - dedi mınıstr.

Onyń aıtýynsha, munaı óndirý sektorynda Teńiz, Qarashyǵanaq jáne Qashaǵan munaıgaz jobalary ósim draıveri bolyp qalýda. 2017 jyly Qashaǵandy óndiristik ıgerý deńgeıi bastalǵaly, elimizde munaı óndirý 2016 jyldaǵy 78 mln tonnadan 86,2 mln tonnaǵa deıin ósti. 

«Onyń ishinde Qashaǵanda ótken jyly 8,3 mln tonna munaı óndirildi. Osy arqyly ónim óndirýdiń jyldyq deńgeıi jańa mejege kóterildi», - dep atap ótti Bozymbaev.

Belgili bolǵandaı, bıylǵy tórt aıda munaı óndirý kólemi elimizde 30 mln tonnaǵa jetip, byltyrǵy sáıkes kezeńge qaraǵanda 6 paıyzǵa ósti.

«Aǵymdaǵy jyly munaı óndirý 87 mln tonna deńgeıinde qalyptasady dep kútilýde. Bul bizdiń aldyn ala boljamymyz. Degenmende, atalǵan kórsetkish birshama artyqtaý bolady degen oıdamyz», - dedi ol.