Qazaqstan munaı óndirý kólemin 2024 jyly 40 mln tonnaǵa deıin arttyrmaq
«Keshe halyq aldynda esep berý kezinde aıtyp ótkenimdeı, bıyl munaı óndirý jospary 89 mln tonna kóleminde bolady. Qashaǵanda jóndeý jumystary merziminen 10 kún buryn aıaqtaldy. Teńiz jáne jerústi qurylystarynda tehnıkalyq jumystar júrgizildi. Qazirgi óndiris kólemi táýligine 400 myń barrelge jetti. Bul - rekord. Aldaǵy ýaqytta Teńiz ken ornyn keńeıtý jobasy aıaqtalsa, 2024 jyly óndiris kólemi jylyna 39-40 mln tonnaǵa deıin ulǵaıady. Qazirgi tańda jobada 45 myńnan astam qazaqstandyq jumys isteıdi. Jumystyń jalpy oryndalý protsesi 61 paıyzdan asty», - dedi Qanat Bozymbaev OQK-da ótken baspasóz máslıhatynda.
Mınıstrdiń aıtýyna qaraǵanda, Teńiz ken ornyn keńeıtý jobasynyń jalpy quny - 37 mlrd AQSh dollar. Sonyń ishinde 12 mlrd dollary - qazaqstandyq qamtý úlesi. Osy somadan búgingi tańda 7 mlrd AQSh dollaryna otandyq kásiporyndardan taýarlar, jumystar men qyzmetter satyp alynǵan.
Eske sala ketsek, keshe el aldynda esep bergen Energetıka mınıstri Qashaǵandaǵy jóndeý jumystary munaı óndirý boıynsha rekordtyq kórsetkishke qol jetkizýge múmkindik bergenin aıtqan edi. Onyń sózinshe, bıyl Qazaqstan 90 mln tonnaǵa jýyq munaı óndirmek.
«Bıylǵy 5 aı ishinde 36,5 mln tonna munaı óndirildi. ıAǵnı, jospar 101% oryndaldy. Úsh iri joba boıynsha 21,7 mln tonna munaı óndirildi. Qashaǵanda - 4,24 mln tonna, Teńizde - 12,48 mln tonna, Qarashyǵanaqta - 4,97 mln tonna óndirildi. Bıyl munaı óndirý kólemi 89 mln tonna bolady», - dedi Qanat Bozymbaev «QazMedıa» ortalyǵynda.
