Qazaqstan munaı óndirý kólemin 100 mln tonnaǵa jetkizedi

ASTANA. QazAqparat - Qazaqstan munaı óndirý kólemin 100 mln tonnaǵa jetkizedi. Bul jaıynda búgin Astana ekonomıkalyq forýmy aıasynda ótken «Bolashaq energııasy jáne álemdik energetıka júıesindegi Qazaqstannyń róli» atty sessııa barysynda QR Energetıka mınıstri Qanat Bozymbaev aıtty, dep habarlaıdy QazAqparat.

«Elimiz táýelsizdik alǵan sátinen bastap munaı óndirý salasy damýynyń oń serpini baıqalady. Máselen, 1991 jyldan beri munaı óndirý kólemi 25,2 mln tonnadan 80 mln tonnaǵa deıin ulǵaıdy. Orta merzimdi keleshekte munaı óndirý ósimi júz mıllıon tonnaǵa deıin  jalǵasatyn bolady», - dedi Qanat Bozymbaev.

Aıta keteıik, Qazaqstan munaı, kómir, gaz jáne ýran qoryna baı. Munaı, gaz, kómir, ýran jáne elektr energııasyn qosa alǵandaǵy bastapqy energııa qorynyń jalpy kólemi  munaı ekvıvalentimen 32 mlrd tonnaǵa nemese búkil álemdegi bastapqy energııa qorynyń shamamen 3,6 protsentke baǵalanady.