Qazaqstan munaıdy kóbirek óńdep, shıkizat eksportyn azaıtpaq
ASTANA. KAZINFORM — Qazaqstanda munaı óńdeý kólemi 2040 jylǵa qaraı jylyna 18 mln tonnadan 39 mln tonnaǵa deıin jetkiziledi. Bul týraly jyl saıynǵy «Ortalyq Azııa jáne Kaspıı munaı-gaz hımııasy jáne munaı óńdeý — 2026» sammıtinde aıtyldy.
QR Energetıka mınıstrliginiń habarlaýynsha, sammıt aıasyndaǵy «Shıkizattyq modeldiń ornyna munaıdy tereń óńdeý» sessııasynda vedomstvonyń Munaı óńdeý jáne munaı ónimderin óndirý basqarmasynyń basshysy Nazym Bekbatyrova 2025-2040 jyldarǵa arnalǵan munaı óńdeý salasyn damytý tujyrymdamasyn tanystyrdy.
Jańa tujyrymdama Qazaqstannyń munaı salasynda shıkizattyq modelden tereń óńdeýge birtindep kóshýge baǵyttalǵan. Qujat aıasynda munaı óńdeý zaýyttarynyń qýatyn kezeń-kezeńimen jańǵyrtý jáne keńeıtý, munaıdy óńdeý tereńdigin arttyrý, munaı ónimderiniń sapasyn jaqsartý jáne munaı-hımııa óndirisin damytý kózdelgen.
Nátıjesinde munaı óńdeý kólemin jylyna 39 mln tonnaǵa deıin arttyrý josparlanyp otyr. Osylaısha munaı óndirý men óńdeý araqatynasy qazirgi 5:1 deńgeıinen 2,5:1-ge deıin jaqsarady.
Salany damytýǵa qajetti ınvestıtsııa kólemi 15-19 mlrd AQSh dollaryna baǵalanyp otyr. Joba aıasynda jańa jumys oryndaryn ashý, munaı óńdeý salasynyń ǵylymı-tehnologııalyq bazasyn kúsheıtý jáne munaı ónimderi men munaı-hımııa ónimderiniń eksportyn ulǵaıtý josparlanǵan.
— Tujyrymdama alty negizgi baǵytty qamtıdy. Olar — ishki naryqty otandyq munaı ónimderimen qamtamasyz etý, munaı-hımııa óndirisin ulǵaıtý, qoldanbaly ǵylymdy damytý, kadrlyq áleýetti kúsheıtý, óndiristi zamanaýı tehnologııalarǵa beıimdeý jáne eksporttyq múmkindikterdi keńeıtý, — delingen habarlamada.
2040 jylǵa deıin munaıdy óńdeý tereńdigin 89%-dan 94%-ǵa deıin arttyrý kózdelgen. Sonymen qatar motor otynynyń sapasy K5+ ekologııalyq synybyna deıin jaqsartylady. Benzol men paraksılol óndirisin de ulǵaıtý josparlanyp otyr.
Eske salaıyq, buǵan deıin Qazaqstanda munaı-gaz kásiporyndaryndaǵy óndiristik baqylaýǵa qoıylatyn talaptar kúsheıtilgenin jazǵan edik.
