Qazaqstan munaı óńdeý qýatyn eki esege arttyrýdy josparlap otyr
ASTANA. KAZINFORM — Halyqaralyq energetıkalyq konferentsııa CERAWeek aıasynda QR Energetıka mınıstri Erlan Aqkenjenov «Munaı naryǵynyń jahandyq boljamy: negizgi faktorlar men geosaıası týrbýlenttik» sessııasyna qatysty, dep habarlaıdy mınıstrliktiń baspasóz qyzmeti.
Talqylaý barysynda vedomstvo basshysy Qazaqstannyń munaı salasynyń qazirgi jaǵdaıyn tanystyrdy. Eldiń jahandyq naryqta senimdi energııa jetkizýshi retindegi pozıtsııasyn saqtaý atap ótildi.
Mınıstr salanyń aldynda turǵan negizgi máselelerdi atap kórsetti. Olarǵa energetıkalyq qaýipsizdik, sonyń ishinde Kaspıı qubyr konsortsıýmy (KQK) turaqty jumysyn qamtamasyz etý máseleleri kiredi, ol arqyly Qazaqstan munaıynyń negizgi bóligi eksporttalady.
Bul marshrýttyń úzdiksiz jumys isteýi ulttyq ekonomıka úshin óte mańyzdy ekeni erekshe atap ótildi.
Sonymen qatar, Qazaqstan eksport baǵyttaryn ártaraptandyrý saıasatyn júıeli túrde júzege asyrýda, onyń ishinde Qytaı Halyq Respýblıkasyna baǵyttalǵan marshrýttardy damytý da qarastyrylǵan. Alaıda KQK ekonomıkalyq tıimdiligi joǵary jáne basym tasymaldaý arnasy bolyp qala beredi.
Shara barysynda munaı-gaz salasyndaǵy ınvestıtsııalyq klımatty jaqsartý máselelerine de erekshe kóńil bólindi. Mınıstr jańa ınvestıtsııalardy geologııalyq barlaý jáne kómirsýtekterdi óndirý salasyna tartýǵa arnalǵan salyqtyq jeńildikterdi qarastyratyn Jaqsartylǵan úlgilik kelisimniń jumys istep turǵanyn atap ótti.
— Sonymen qatar, munaı-hımııa salasyn damytýǵa arnalǵan strategııalyq josparlar da kórsetildi. Qazaqstan munaı óńdeý qýatyn eki esege arttyrýdy josparlap otyr, bul tek ishki naryqty qamtamasyz etip qana qoımaı, Ortalyq Azııa óńirinde munaı ónimderin jetkizýshi retindegi eldiń pozıtsııasyn nyǵaıtýǵa múmkindik beredi. Qazaqstannyń CERAWeek konferentsııasyna qatysýy — eldiń halyqaralyq energetıkalyq qaýymdastyqpen belsendi dıalog júrgizýge jáne jahandyq syn-qaterler men geosaıası týrbýlenttik jaǵdaıynda teńdestirilgen saıasatty ilgeriletýge umtylysyn rastaıdy, — delingen habarlamada.
Budan buryn Aqtóbe áýejaıy energetıkalyq jabdyqtardy paıdalaný talabyn saqtamaǵany úshin aıyppul tóleıtinin jazǵanbyz.
